BDU-da Samur-Dəvəçi fiziki-coğrafi rayonunun sahilyanı ərazilərinin CİS mühitində tədqiqi davam edir
Bakı, 19 mart, AZƏRTAC
Bakı Dövlət Universitetinin (BDU) Coğrafiya fakültəsində 27 Mart – Azərbaycan Respublikasında Elm Günü ilə bağlı silsilə tədbirlər çərçivəsində “Samur-Dəvəçi fiziki-coğrafi rayonunun sahilyanı ərazilərində landşaft tiplərinin transformasiyasına təbii və antropogen amillərin təsirinin Coğrafi İnformasiya Sistemləri (CİS) mühitində təhlili” mövzusunda elmi seminar keçirilib.
BDU-dan AZƏRTAC-a bildirilib ki, mövzu üzrə məruzə edən fakültənin doktorantı Günay Abbasova müasir dövrdə ərazilərin elmi əsaslarla öyrənilməsində CİS-lərin mühüm rol oynadığını qeyd edib. Diqqətə çatdırıb ki, tədqiq olunan ərazi DEM (Rəqəmsal Yüksəklik Modeli - Digital Elevation Model), “Slope” (“Meyillilik) və “Aspect” (“Baxarlılıq”) üsulları ilə araşdırılıb. DEM təhlilləri nəticəsində müəyyən olunub ki, tədqiqat ərazisinin yüksəklik diapazonu 26 metrdən 680 metrə qədər dəyişir. Meyillilik xəritəsi əsasında ərazi altı kateqoriyaya bölünüb. Baxarlılıq xəritəsi isə yamacların hansı istiqamətdə baxdığını təhlil etməyə imkan verir. Bu amil günəş radiasiyası və rütubət balansına təsir etdiyindən landşaft tiplərinin formalaşmasında əhəmiyyətli rol oynayır.
CİS mühitində aparılmış təhlillər göstərir ki, 2017-2024-cü illər ərzində 1009 km² ərazi intensiv parçalanmış dağətəyi arid meşə-kolluq landşaftına, 447,7 km² ərazi orta dərəcədə parçalanmış dağarası düzənliklərə, 896 km² ərazi isə orta və zəif parçalanmış dağarası düzənliklərə və ovalıqlara aid olub.
Sonda fakültənin professor-müəllim heyəti məruzə ilə bağlı fikirlərini bildiriblər.
Seminar müzakirələrlə davam edib.
Bölmənin digər xəbərləri
