İyunun 10-da Bərdədə Qarabağ atlarının satış-sərgi yarmarkası və cıdır yarışları keçirilmişdir.

Kənd Təsərrüfatı Nazirliyinin mətbuat xidmətindən AZƏRTAC-a bildirmişlər ki, tədbirin burada keçirilməsi təsadüfi deyildir. Belə ki, Xan qızı Natəvanın Qarabağ atlarından ibarət ilxısı vaxtilə bu ərazilərdə saxlanılırmış. Digər tərəfdən, bərdəlilərin atçılıq sahəsində zəngin təcrübələri yaxşı məlumdur.

Yarmarka və cıdır yarışlarında Ağdam, Bərdə, Yevlax, Beyləqan, İmişli, Tərtər, Goranboy, Şəki rayonlarının fermer təsərrüfatlarından 312 baş Qarabağ atları iştirak etmişlər.

Cıdır yarışları rayonun Qasımbəyli kəndində, sərgiyə gətirilmiş atların arasından seçilmiş 100 atın iştirakı ilə keçirilmişdir. Təşkilatçılar yarışları Azərbaycan Respublikasına, Kənd Təsərrüfatı Nazirliyinə, Qarabağ xanlığının banisi və Şuşa şəhərinin əsasını qoymuş Pənahəli xanın, onun oğlu, böyük sərkərdə İbrahimxəlil xanın, Mehdiqulu xanın qızı şairə Natəvanın, uzun illər Bərdə rayonuna rəhbərlik etmiş Rüstəm Səfərəliyevin, el ağsaqqalı Hüseyn Ağayevin xatirəsinə həsr etmişdilər. Hər cıdırdan əvvəl bu adlar çəkilir, onlar barədə iştirakçılara məlumat verilirdi.

Yarışlarda Ağdam atçılıq zavodunun “Sinəbənd” atı, Bərdənin Soğanverdilər kəndindən Murad Mirişovun, Goranboyun Cinli-Boluslu kəndindən Asəf Nəbiyevin, İmişlinin Sərxanlı kəndindən Fərahim Nəsirovun, Ağcabədinin Yuxarı Qiyamədinli kəndindən Fariz Mirzəyevin, Tərtərin Sarıcalar kəndindən Zabil Məcidovun, Yevlağın Kövər kəndindən Şükür Hüseynovun yetişdirdikləri atlar birinci yeri tutmuşlar. Ümumiyyətlə, 30 qalib mükafatlandırılmışdır.

Bərdə Rayon İcra Hakimiyyətinin başçısı İlham Ağayev və Kənd Təsərrüfatı Nazirliyinin şöbə müdiri Çingiz Fərəcov satış-sərginin iştirakçılarını təbrik etmiş, onlara uğurlar arzulamışlar. Çingiz Fərəcov ölkəmizdə atçılığın vəziyyətindən danışmış, bu sahəni inkişaf etdirmək məqsədi ilə görülən tədbirlər barədə məlumat vermişdir.

Sonra “Al papaq” milli oyunu nümayiş etdirilmişdir.

Xüsusi komissiyanın baxışından sonra seçilmiş 5 atın sahibinə qiymətli hədiyyələr verilmişdir.

Satış-sərgi yarmarkasının təşkilatçıları, həmçinin, Qarabağ atlarının Avropada çox məşhur olduğunu bildirmişlər. Qeyd olunmuşdur ki, Almaniyanın Frankfurt şəhərində xanım Verena Solianın rəhbərliyi ilə “Qarabağ atlarının dostları” klubu fəaliyyət göstərir. Bu qadın tez-tez Azərbaycana gəlir, Qarabağ atlarının vəziyyəti ilə maraqlanır. Onun təşəbbüsü ilə bu atların kataloqu dərc olunmuşdur.

Xatırladaq ki, Ağdamın böyük bir hissəsi erməni işğalı altında olduğuna görə, vaxtilə rayon ərazisində fəaliyyət göstərən atçılıq zavodunun atları hazırda Bərdə rayonunun Ləmbəran kəndində saxlanılır.