Beynəlxalq Şahmat Festivalında 4-cü tura yekun vurulub
Naxçıvan, 4 may, AZƏRTAC
Naxçıvan şəhərindəki Şahmat Mərkəzində ümummilli lider Heydər Əliyevin anadan olmasının 95-ci ildönümünə həsr olunan “Naxçıvan-2018” Beynəlxalq Şahmat Festivalında 4-cü tura yekun vurulub.
AZƏRTAC-ın Naxçıvan bürosu xəbər verir ki, “A” qrupunun liderləri bu turda da üz-üzə gəliblər. Belə ki, azərbaycanlı qrossmeysterlər Eltac Səfərli (2657), Nicat Məmmədov (2602) və Fərid Abbasov (2531) müvafiq olaraq ukraynalı qrossmeyster Vitaliy Bernadskiy (2589), almaniyalı qrossmeyster İqor Xenkin (2557) və israilli qrossmeyster İlia Smirinlə (2592) qarşılaşıblar. Hər üç görüş heç-heçə başa çatıb. Qazaxıstanlı beynəlxalq usta Pak Yevgeni (2390) isə belaruslu qrossmeyster Aleksey Aleksandrovu (2594) məğlub edib. Azərbaycanlı qrossmeysterlərdən Qədir Hüseynov (2654) beynəlxalq usta Vüqar Əsədlidən (2470) üstün olub. Turnirin ən reytinqli şahmatçısı, ukraynalı qrossmeyster Anton Korobov bu turda da heç-heçə edib. O, bu dəfə gürcüstanlı beynəlxalq usta İrakli Beradze (2486) ilə xalları yarı bölüb.
Naxçıvanlı zəka sahiblərindən Urfan Sevdimalıyev (2397) iranlı qrossmeyster Mitra Hejazipurla (2283) xalları yarı bölüb. FIDE ustalarımız Pərviz Qasımov (2329) və Sadiq Məmmədov (2293) müvafiq olaraq azərbaycanlı beynəlxalq ustalar Nail Bəşirli (2374) və Məhəmməd Muradlı (2417) ilə görüşüblər. Pərviz Qasımov və Sadiq Məmmədov ağ-qara taxtanı məğlub tərk edib. Beynəlxalq usta Toğrul Həsənzadə (2350) isə İran şahmatçısı Purmosavi Seyid Kiani (2230) üzərində qələbə qazanıb.
Hazırda turnir cədvəlinə 3,5 xalla qazaxıstanlı beynəlxalq usta Pak Yevgeni başçılıq edir. Onu 3 xalla 10 zəka sahibi izləyir.
Beynəlxalq Şahmat Festivalının “B” qrupunda 48 görüş keçirilib ki, onların da 20-də ağ fiqurlarla mübarizə aparan zəka sahibləri qalib gəliblər. 19 görüşdə qara fiqurlarla oynayan şahmatçılar qələbə qazandığı halda, 9 görüş “sülh”lə başa çatıb. Hazırda bu qrupda 3 şahmatçı - Samir Davidov (2216, Xaçmaz), Təbriz İdrisov (2206, Bakı) və Şahin Hüseynov (2182, Bakı) 4 xala turnir cədvəlinə başçılıq edirlər.
“C” qrupunun liderlərindən olan naxçıvanlı şahmatçılar İlkin Qabulov (1328) və Sadiq Abbasov (1312) bu turda rəqibləri ilə “sülh” bağlayıblar. Ümumiyyətlə, 4 turdan sonra hazırda turnir cədvəlinə 4 zəka sahibi başçılıq edir.
Bölmənin digər xəbərləri
