Botanika İnstitutunun magistrantı “Magistr-2019” müsabiqəsinin qalibi olub
Bakı, 4 aprel, AZƏRTAC
“Elm günü” çərçivəsində Azərbaycan Milli Elmlər Akademiyasının (AMEA) magistraturasında təhsil alanlar üçün “Magistr-2019” müsabiqəsi keçirilib.
Botanika İnstitutundan AZƏRTAC-a bildirilib ki, müsabiqəyə təqdim olunan 35 magistrantın işləri AMEA prezidentinin sərəncamı ilə yaradılan ekspert komissiyası tərəfindən qiymətləndirilib. Botanika İnstitutunun II kurs magistrantı Lalə İsgəndərova “Magistr-2019” müsabiqəsinin nəticələrinə görə I yerə layiq görülüb. AMEA Rəyasət Heyətinin növbəti iclasında qalibə pul mükafatı və diplom təqdim edilib.
Lalə İsgəndərova cari ilin yanvarında Almaniyanın Berlin Freie Universitetində bitkilərin molekulyar filogenetikası üzrə təşkil olunan ixtisas kursunda iştirak edib.
Qiymətləndirmə tələbələrin Dövlət İmtahan Mərkəzi (DİM) tərəfindən keçirilən magistraturaya qəbul imtahanında topladıqları balları, onların imtahan sessiyalarında qazandıqları ümumi orta müvəffəqiyyət göstəricilərini, yerli və xarici jurnallarda nəşr olunan elmi məqalələrini, təcrübə keçmədə iştiraklarını, elmi tədqiqat layihələrində, konfrans və s. tədbirlərdə iştiraklarını nəzərə alaraq aparılıb.
Bölmənin digər xəbərləri
