Böyüklər arasında boks üzrə Azərbaycan çempionatı davam edir
Bakı, 13 yanvar, AZƏRTAC
Şağan Olimpiya Kompleksində keçirilən boks üzrə Azərbaycan çempionatının finalçıları müəyyənləşib.
AZƏRTAC xəbər verir ki, “Rabitə”nin 6, “Gilan” klubunun isə 5 nümayəndəsi həlledici döyüşlərdə iştirak etmək hüququ qazanıb.
Salman Əlizadə 49 kiloqram çəki dərəcəsində çempionatın əsas favoritlərindən olduğunu bir daha sübut edib. Avropa çempionu finalda qələbə qazanaraq yenidən birinci nömrə kimi özünü təsdiqləməyə çalışacaq. Onun rəqibi isə Hacıbaba Fərziyev olacaq.
Gənclər arasında dünya birinciliyinin bürünc mükafatçısı Məsud Yusifzadə (52 kq) də finala yüksəlib. O, həlledici görüşdə milli komandamızın üzvü Araz İmaməliyev ilə qarşılaşacaq.
Uzun illər seçmə komandamızın kapitanı olmuş Rəhim Nəcəfov (56 kq) da finala kimi irəliləyə bilib. Azərbaycan çempionatının tapıntılarından biri Tayfur Əliyev təcrübəli boksçunu büdrətməyə çalışacaq.
Lənkəran boksçusu Xəzər Əliyevin (64 kq) finala kimi irəliləməsi gözlənilməz nəticələrdəndir. Qızıl medal uğrunda görüşdə onu təcrübəli Elnur Əliyev gözləyir.
“Baku Fires”i “Gilan” klubuna dəyişən Xaybulla Musalov (75 kq) da finaldadır. O, ötən ilin Azərbaycan çempionu titulunu qorumaq üçün Kamran Şahsuvarlını məğlub etməlidir.
Səksən bir kiloqram çəki dərəcəsində boks həvəskarları yenə də Vətən Hüseynli - Rauf Rəhimov duelinin şahidi olacaqlar. Avropa çempionu, Olimpiya Oyunlarının bürünc mükafatçısı Teymur Məmmədov finalda gənc Rahil Məmmədli ilə qarşılaşacaq. Superağır çəki dərəcəsində isə həlledici görüşdə Kamran Mehdiyev ilə Asəf Aslanlı döyüşəcəklər.
Bölmənin digər xəbərləri
