Gürcüstan Ətraf Mühitin və Təbii Ehtiyatların Mühafizəsi Nazirliyindən verilən məlumata görə bp şirkəti Bakı-Tbilisi-Ceyhan neft kəməri çəkilişinin Borjomi dərəsindəki 17 kilometrlik sahəsində təhlükəsizliyin təmin olunmasına dair əlavə tədbirlər planını avqustun 16-dək Gürcüstan hökumətinə təqdim etməlidir. Həmin sənəd ölkənin Milli Təhlükəsizlik Şurasında müzakirə olunub təsdiqlənəcəkdir.

Xatırladaq ki, Ətraf Mühitin və Təbii Ehtiyatların Mühafizəsi Nazirliyinin Gürcüstan Milli Təhlükəsizlik Şurası ilə birgə qəbul etdiyi qərara əsasən iyulun 20-də bp-nin Borjomi dərəsində BTC-nin tikintisinə dair təəhhüdlərə tam əməl etmədiyinə görə neft kəmərinin çəkilişi müvəqqəti dayandırılmışdı. Şirkət Gürcüstan hökumətinə bununla bağlı tədbirlər planını təqdim edəcəyinə razılığını bildirdikdən sonra, avqustun 6-da tikinti işlərinin bərpasına icazə verilmişdir.