bp ilə əməkdaşlıq çərçivəsində BDU-da yeni mərkəz yaradılıb
Bakı, 16 may, AZƏRTAC
bp şirkətinin Bakı Dövlət Universitetinin (BDU) tədris infrastrukturunun modernləşdirilməsi və genişləndirilməsinə yönəlmiş daha bir sosial layihəsi uğurla tamamlanıb.
AZƏRTAC xəbər verir ki, layihə çərçivəsində universitetdə müasir və interaktiv tədris məkanı – faydalı qazıntılar muzeyi əsaslı şəkildə və fərqli konsepsiya əsasında yenidən qurularaq istifadəyə verilib. Bu innovativ məkan Azərbaycanın zəngin geoloji irsi, təbii ehtiyatları və bu sahədəki elmi nailiyyətlərini əhatəli şəkildə təqdim etmək məqsədilə müasir rəqəmsal texnologiyalarla təchiz olunub.
Yeni muzey, kitabxana və tədris mərkəzi geologiya və əlaqəli sahələr üzrə müəllim və tələbələr üçün tədris, elmi-tədqiqat və öyrənmə proseslərini daha effektiv həyata keçirməyə imkan yaradır.
Açılış mərasimində BDU-nun rektoru Elçin Babayev bu mərkəzin strukturu və funksiyaları barədə ətraflı məlumat verib. Bildirilib ki, mərkəzdəki muzey müxtəlif tematik guşələri əhatə edir: Azərbaycanın geologiya tarixi, bölgələrin geoloji xüsusiyyətləri, mineral ehtiyatları, fosilləri və paleontologiyası, qeyri-adi geoloji quruluşlar, qorunan təbiət abidələri və s. Hər guşə interaktiv ekranlar, xəritələr, elmi eksponatlar, multimedia vasitələri və virtual reallıq elementləri ilə zənginləşdirilib və ziyarətçilərə maarifləndirici imkanlar təqdim edir.
Mərkəzin tərkibində xüsusi tədris zonası da nəzərdə tutulub. Burada tələbələr və professor-müəllim heyəti tədris və elmi fəaliyyətlər üçün zəngin məzmundan faydalana biləcək. Mərkəzdə, həmçinin akademik Musa Əliyevin BDU-ya hədiyyə edilmiş şəxsi kitabxanası da yeni formatda istifadəyə verilib. Qeyd olunub ki, bu kitabxananın Moskvadan Bakıya gətirilməsində ADA Universitetinin rektoru Hafiz Paşayevin xüsusi rolu olub.
Professor Hafiz Paşayev mərasimdə çıxış edərək akademik Musa Əliyevin elmi irsi, keçmiş SSRİ məkanında və o cümlədən Azərbaycanda, Əlcəzairdə həyata keçirdiyi neft kəşfiyyatı işləri barədə məlumat verib. Bildirilib ki, BDU Azərbaycanın elm, təhsil və maarif mərkəzlərindən birinə çevrilib və burada minlərlə mütəxəssis yetişdirilib.
Professor Hafiz Paşayev akademik Musa Əliyev və professor Mir Cəlal Paşayev arasında olan dostluq və elmi dialoqlardan da danışıb. Qeyd edib ki, biri humanitar, digəri isə təbiət elmləri üzrə fəaliyyət göstərsə də, onların müzakirələri dərin məzmun kəsb edirdi. Eyni zamanda vurğulanıb ki, Xəzər dənizində Neft Daşlarının kəşfində də Musa Əliyevin mühüm xidmətləri olub.
Rektor Elçin Babayev professor Mir Cəlal Paşayevin akademik Musa Əliyevə yazdığı əlyazma məktubu Hafiz Paşayevə təqdim edib.
Açılışda çıxış edən bp-nin Azərbaycan, Gürcüstan və Türkiyə üzrə regional prezidenti Qəri Counz bildirib: “Bu layihə ölkədə təhsilə və sosial inkişafa verdiyimiz dəstəyin gözəl nümunəsidir. Tərəfdaşlarımızla birlikdə məmnunuq ki, yüz ildən artıq tarixi olan və aparıcı ali təhsil müəssisəsi kimi tanınan BDU belə unikal bir mərkəzə sahib oldu. Mərkəz geoloji və geofiziki biliklərin zəngin bazasını innovativ formada təqdim etmək imkanı yaradacaq. Ümid edirik ki, bu muzey ziyarətçilərə Yer kürəsinin sərvətlərini kəşf etmək üçün unikal təcrübə bəxş edəcək və ölkənin geoloji irsinin dərin şəkildə dərk olunmasına töhfə verəcək.”
Rektor Elçin Babayev universitetin xatirə hədiyyəsini Qəri Counza təqdim edib.
Tədbirdə Milli Məclis sədrinin müavini Rafail Hüseynov, akademiklər Nizami Cəfərov, Akif Əlizadə və Vasif Babazadə çıxış edərək akademik Musa Əliyev haqqında, BDU-nun uğurlarından və yeni mərkəzin əhəmiyyətindən danışıblar.
Tədbir iştirakçıları Xatirə Kitabına ürək sözlərini yazıblar.
Bölmənin digər xəbərləri
