BU GÜN BELÇİKA MİLLİ BAYRAMINI QEYD EDİR
Bakı, 21 iyul (AZƏRTAC). İyulun 21-də Belçika milli bayramını siyasi böhran şəraitində qeyd edir. Bu il iyunun 14-də keçirilmiş parlament seçkilərindən sonra Avropanın bu ölkəsində yeni hökumət indiyədək formalaşmamışdır. Siyasətçilər hökumət koalisiyası yaradılmasına növbəti cəhd göstərirlər, lakin bu prosesin payıza qədər uzanacağı bildirilir.
Belçika 1830-cu il inqilabından sonra müstəqil dövlət olmuşdur. 1831-ci ildə Belçikanın ilk kralı I Leopold konstitusiyaya and içmiş və 1890-cı ildən həmin gün Belçikada rəsmi surətdə milli bayram elan edilmişdir.
İyulun 21-də Belçikanın hər yerində çoxsaylı bayram tədbirləri keçiriləcəkdir, lakin əsas hadisə Brüsseldə Saray meydanında baş verəcəkdir: burada ənənəvi hərbi parad olacaqdır. Bu il parad Belçikanın Avropa İttifaqında sədrliyinə həsr olunmuşdur və bununla əlaqədar paradda Avropa İttifaqının üzvü olan 26 ölkənin hərbi bölmələri iştirak edəcəklər.
Bölmənin digər xəbərləri
