Bu il Beynəlxalq Ailə Günü “Dayanıqlı inkişaf üçün ailə mərkəzli proqramlar” mövzusunda qeyd edilir
Bakı, 15 may, AZƏRTAC
Beynəlxalq Ailə Günü 1993-cü ilin sentyabrında Birləşmiş Millətlər Təşkilatı tərəfindən təsis edilib. 2025-ci ildə bu əlamətdar gün “Dayanıqlı inkişaf üçün ailə mərkəzli proqramlar” mövzusunda qeyd edilir. Beynəlxalq Ailə Günü davamlı inkişafın təşviqində müvafiq proqramların əsas roluna diqqət yetirəcək. Gün ərzində keçirilən tədbirlər Dayanıqlı İnkişaf üzrə 2030 Gündəliyinə nail olmaqda ailələrin rolunu vurğulayan milli və regional təşəbbüsləri vurğulayacaq.
AZƏRTAC xəbər verir ki, bu bayramın təsis edilməsi ideyası hələ 1989-cu ildə yaranıb. Müxtəlif ölkələrin ictimaiyyətinin diqqətini ailə problemlərinə cəlb etmək istəyən BMT Baş Assambleyası 1993-cü ildə bu əlamətdar günün təsis edilməsi haqqında qətnamə qəbul edib. Həmçinin 1994-cü il Beynəlxalq Ailə İli elan olunub.
Bu günün təsis edilməsi ictimaiyyətin diqqətini ailələrin çoxsaylı problemlərinə yönəltmək məqsədi daşıyır. Onun həyata keçirilməsi maarifləndirmə səviyyəsini yüksəltməyə və ailələrin vəziyyətinə təsir edən sosial-iqtisadi və demoqrafik proseslərə dair bilikləri dərinləşdirməyə imkan verir.
Bu bayramın rəsmi loqotipi binanın içərisində qırmızı ürək təsviri olan yaşıl dairədir. Şəkil bayramın fəlsəfəsini əks etdirir: sevgi və qarşılıqlı hörmətin hökm sürdüyü ailə cəmiyyətin mərkəzidir və istənilən statusda və yaşda insanı dəstəkləməyə qadirdir.
BMT hesab edir ki, bir ailənin fundamental hüquqları pozulduqda, onların üzvü olduğu bütün bəşər icmasının birliyi təhlükə altına düşür. Cəmiyyətin əsas institutlarından biri, insanın sosiallaşmasının ilk mərhələsi olan ailə ətraf aləmlə ahəngdar şəkildə inkişaf edir, dəyişir, zamanın tələblərinə özünəməxsus şəkildə reaksiya verir, sosial tələblər fonunda reallıqları özü formalaşdırır.
Ailə cəmiyyətin əsas elementi kimi həmişə bəşəri dəyərlərin, mədəniyyətin və nəsillərin tarixi davamlılığının qoruyucusu, sabitlik və inkişaf amili olub və belə olaraq qalır. Onun sayəsində dövlət güclənir, inkişaf edir, xalqın rifahı yüksəlir. Bütün dövrlərdə bir ölkənin inkişafı ailənin cəmiyyətdəki mövqeyi və dövlətin ona münasibətilə qiymətləndirilib.
İnsanın həyatı ailədən başlayır və o, burada vətəndaş kimi formalaşır. Ailə məhəbbət, hörmət, həmrəylik mənbəyidir, insan hər hansı bir sivil cəmiyyətin üzərində qurulan bu təsisatsız mövcud ola bilməz. Ailənin rifahı ölkənin inkişafı və tərəqqisinin meyarıdır.
Dünyada evsiz ailələrin sayının artması da narahatlıq doğurur. Beləliklə, bir sıra Avropa ölkələrində evsiz ailələrin sayı daimi evsizlərin ümumi sayının 20 faizindən çoxunu təşkil edir.
Dünyanın bir çox ölkələrində demoqrafik inkişaf üçün bütöv strategiyalar işlənib hazırlanıb. Bu əlamətdar gündə konsertlər, ailə həyatında böyük təcrübəyə malik olan evli cütlərin görüşləri, uşaqlı himayədar ailələr, çoxuşaqlı və aztəminatlı ailələrin uşaqları üçün xeyriyyə tədbirləri, gənc ailələr üçün təlimlər, tematik seminarlar və konfranslar keçirilir, radio və televiziya proqramları, qəzet nəşrləri və ailə mövzularına həsr olunmuş proqramlar təşkil olunur.
Qətərin paytaxtı Dohada 2025-ci ilin noyabrında keçiriləcək Sosial İnkişaf üzrə İkinci Ümumdünya Sammiti yoxsulluğun aradan qaldırılması, layiqli iş və sosial inklüzivliyin təmin edilməsi üzrə öhdəlikləri yeniləmək imkanı verir. Zirvə toplantısı 1995-ci il Kopenhagen Bəyannaməsinə əsaslanır və bu sənəddə ailənin cəmiyyətin əsası olduğu bildirilir və iş-ailə balansının, habelə ev təsərrüfatlarında bərabər tərəfdaşlığın təmin edilməsinin zəruriliyi vurğulanır.
2025-ci il Beynəlxalq Ailə Günü texnoloji transformasiya, demoqrafik dəyişikliklər, urbanizasiya, miqrasiya və iqlim dəyişikliyi kimi əsas trendləri həll etmək üçün ailəyə uyğun siyasətlərin milli inkişaf gündəmlərinə inteqrasiyasının vacibliyi barədə məlumatlılığı artırmaq məqsədi daşıyır.
Bölmənin digər xəbərləri
