Bu il DİM-in təşkil etdiyi müxtəlif təyinatlı imtahanlarda ümumilikdə 490 min 430 nəfər iştirak edib
Bakı, 23 may, AZƏRTAC
2025-ci ildə Dövlət İmtahan Mərkəzinin təşkil etdiyi müxtəlif təyinatlı imtahanlarda ümumilikdə 490 min 430 nəfər iştirak edib.
AZƏRTAC xəbər verir ki, bunu Dövlət İmtahan Mərkəzinin (DİM) İdarə Heyətinin sədri Məleykə Abbaszadə Ali təhsil müəssisələrinə qəbul imtahanlarının başlaması ilə əlaqədar keçirilən mətbuat konfransında deyib. O bildirib ki, ali təhsil müəssisələrinə qəbul imtahanlarında bu il 103 min 622 abituriyent, magistraturaya qəbul imtahanlarında isə 43 min 333 nəfər iştirak edib. Rezidenturaya qəbulun birinci mərhələsində 1400 nəfər öz biliklərini sınayıb.
“Tam orta təhsil (11 illik) səviyyəsi üzrə buraxılış imtahanlarında 26 min 691, ümumi orta təhsil (9 illik) səviyyəsində isə 164 min nəfər iştirak edib.
Dövlət qulluğuna qəbul imtahanlarında 7318 nəfər, dövlət orqanlarına isə təxminən 500 nəfər qəbul olunub. Doktoranturaya qəbul imtahanlarında da təxminən 500 nəfər iştirak edib.
İl ərzində keçirilmiş 14 sertifikasiya imtahanında 7699 nəfər iştirak edib. Beynəlxalq imtahanlara maraq da artıb – TOEFL imtahanı 13 dəfə keçirilib və təxminən 200 nəfər, SAT imtahanı isə 3 dəfə təşkil olunub və 400-450 nəfər iştirak edib. Digər beynəlxalq imtahanlarda ümumilikdə təxminən 500 nəfər iştirak edib.
Azərbaycan dövlət idarəçiliyi imtahanında 27 min nəfər iştirak edib. Müxtəlif digər imtahanlarda isə 3386 nəfər öz bilik və bacarıqlarını nümayiş etdirib”.
Bölmənin digər xəbərləri
