Bu il ədəbiyyat üzrə Nobel mükafatı təqdim edilməyəcək
Stokholm, 4 may, AZƏRTAC
Bu il ədəbiyyat üzrə Nobel mükafatı təqdim edilməyəcək.
AZƏRTAC İsveç KİV-lərinə istinadla xəbər verir ki, Nobel mükafatının verilməsinə görə cavabdeh orqan olan İsveç Akademiyası 2018-ci il üçün ədəbiyyat üzrə Nobel mükafatının 2019-cu il üçün laureatların təltif edilməsi ilə paralel olaraq veriləcəyini və təqdim olunacağını bildirib. Bu qərar Akademiya üzvləri tərəfindən yol verilən seksual həyasızlıq halları ifşa ediləndən sonra orada başlanmış qalmaqalın bir növ davamı olub və bütün Akademiyanın nüfuzuna sarsıdıcı təsir göstərib.
Qeyd edək ki, İsveç Akademiyasında baş vermiş qalmaqal 71 yaşlı Jan-Klod Arnonun adı ilə bağlı olub. İsveç KİV-lərində yayılmış məlumatlara görə, 2017-ci ilin noyabr ayında internetdə keçirilən “#MeToo” kampaniyası çərçivəsində Akademiyanın üzvləri və əməkdaşları, həmçinin akademiklərin arvadları və qızları olan 18 qadın Arnonun seksual həyasızlıqlarını bəyan edərək bildiriblər ki, bu fakt Akademiyaya məlum olub. Akademiyanın daimi üzvlərindən bir neçəsi bu qalmaqalla əlaqədar protest əlaməti olaraq onu tərk edib. Nəticədə Akademiyanın iş qabiliyyəti böhranlı dərəcədə azalıb. Bu böhranın tənzimlənməsinə İsveç kralı XVI Karl Qustav qoşulmalı olub.
Rauf Əliyev
AZƏRTAC-ın xüsusi müxbiri
Stokholm
Bölmənin digər xəbərləri
