Bakı, 25 sentyabr (AZƏRTAC). Cari ilin sonunadək Xəzər dənizinin Azərbaycan sektorunda yerləşən “Şahdəniz” perspektiv yatağının işlənməsi layihəsinin ikinci fazasının icrasına başlanacaqdır.

AZƏRTAC xəbər verir ki, bunu Azərbaycan Respublikası Dövlət Neft Şirkətinin prezidenti Rövnəq Abdullayev jurnalistlərə müsahibəsində demişdir. Bu il “Şahdəniz-1” layihəsinin 15 ilinin tamam olduğunu bildirən R.Abdullayev ötən müddətdə Azərbaycanın neft strategiyasının özünü doğrultduğunu qeyd etmişdir. R.Abdullayev “Şahdəniz-2” layihəsinin Türkiyə və Avropanın enerji təhlükəsizliyinə böyük töhfə verəcəyinə ümidvar olduğunu söyləmişdir.

“Şahdəniz-2” layihəsi çərçivəsində Azərbaycanda illik qaz hasilatının 30 milyard kubmetrə çatacağı proqnozlaşdırılır.