“BU MEYDAN, BU EKRAN” MÜSABİQƏSİNİN LAYİHƏLƏRİ BƏYƏNİLMİŞDİR. İŞ DAVAM ETDİRİLİR
AZƏRTAC xəbər verir ki, mayın 21-də Mədəniyyət və Turizm Nazirliyinin keçirdiyi “Bu meydan, bu ekran” müsabiqəsinin yeddi layihəsi bəyənilmişdir, hazırda nazirliyin maliyyə dəstəyi ilə çəkilişlər gedir. “İki” (rejissor Hacıbaba Həsənov, RTV prodüser mərkəzi, prodüser Araz Məmmədov), “Kor və korluq” (rejissor Alina Abdallayeva, “Imper Qrup”, prodüser Rəşad Qasımov), “Qocalar” (rejissor Fariz Məmmədov, “Imper Qrup”, prodüser İsmayıl Məmmədov), “Daş atan” (rejissor Elruza Fatiyeva, “Ratio TV, prodüser Abdulnasir Kutiyev), “Saat” (rejissor Türkan Hüseynova, “Nur+”, prodüser Vəfalı Qasımov), “Koramal” (rejissor Elməddin Əliyev, “EXA Rrodakşn”, prodüser Xəyyam Abdullayev), “Xəbər (rejissor Elməddin Əliyev, “Qodzyuru Okinava Karate do Kobudo” İdman Federasiyası, prodüser Tarıverdi Allahverdiyev) tammetrajlı filmlərin layihələri həyata vəsiqə almışdır.
Qaliblərə diplomları mədəniyyət və turizm naziri Əbülfəs Qarayev təqdim etmişdir. O bildirmişdir ki, müsabiqənin təşkilatçıları müəyyən çətinliklərlə rastlaşmışlar. Nazir demişdir: “Şübhəsiz ki, gələcəkdə də problemlər yaranacaqdır, çünki onlar bir o qədər də asan həll olunmur. Ancaq iş gedir və biz müsabiqəni gələn il davam etdirəcəyik. Birinci müsabiqənin üç, ikincinin beş qalibi olmuşdur, bu il isə yeddi layihə qalib gəlmişdir. Səkkizinci layihə isə hazırda nəzərdən keçirilir”. Ə.Qarayev vurğulamışdır ki, müsabiqənin keçirilməsi ənənəsi davam etdiriləcəkdir.
Müsabiqəyə təqdim olunan materiallardan danışan nazir bildirmişdir ki, onlar heç də həmişə keyfiyyətli olmur, çox vaxt şablon, yaxud sxematik xarakter daşıyır. Məsələn, polis forması geyinmiş şəxs, nədənsə, birmənalı şəkildə pis adamdır. Ancaq məlumdur ki, hər yerdə, o cümlədən də Azərbaycanda “əliəyri” polislərlə mübarizə aparılır. Yeri gəlmişkən, dövri mətbuatda dərc olunan resenziyalar da əsl vəziyyəti düzgün əks etdirmir. Ssenariçilərin və rejissorların işini ağız dolusu tərifləyən jurnalistlər konstruktiv tənqidə yer vermirlər. Ə.Qarayev demişdir: “Təbii ki, intriqasız ssenari olmur. Məişətdə baş verən və bizi narahat edən məsələlər kinomüsabiqədə əksini tapmalıdır. Lakin buna cəmiyyətin inkişafına mane olan mənfi halların kökünün kəsilməsi mövqeyindən yanaşmaq lazımdır. Diplomlu layihələr yetərincə yüksək səviyyədə hazırlanır. Azərbaycanın xarici tamaşaçılara göstərilə biləcək filmləri vardır”.
Bölmənin digər xəbərləri
