Bakı, 10 yanvar, AZƏRTAC

Azərbaycan 2024-cü ildə həm iqtisadi artım tempini, həm də makroiqtisadi stabilliyini qoruyub saxlaya bildi. 2024-cü ildə praktik olaraq ümumi daxili məhsul (ÜDM) 4 faiz, qeyri-neft sektoru 6 faizdən çox, qeyri-neft sənayesi 7 faizdən çox artdı və ölkəmizin böyük iqtisadi irəliləyişi qeyri-neft sektorunun hesabına formalaşdı. Bu isə o deməkdir ki, bu gün qeyri-neft sektoru Azərbaycanda iqtisadi inkişafın aparıcı qüvvəsinə çevrilib.

Bu sözləri AZƏRTAC-a açıqlamasında Milli Məclisin deputatı Vüqar Bayramov bildirib.

O qeyd edib ki, həm regional, həm də qlobal iqtisadi çətinliklərin daha da dərinləşdiyini və regiondakı iqtisadi-siyasi gərginliyin region ölkələrinin iqtisadiyyatına praktik olaraq təsir göstərdiyini nəzərə alsaq, bütün bunlara rəğmən Azərbaycanın iqtisadi artım tempini, stabilliyini qoruyub saxlaya bilməsi böyük uğurdur. Bu da təbii ki, bir tərəfdən iqtisadiyyatın inkişafı ilə bağlı aparılan islahatların səmərəliliyini, digər tərəfdən onların real nəticələrini göstərən əsas meyarlardandır. Bu baxımdan məhz Prezidentin rəhbərliyi ilə Azərbaycanın 2024-cü ildə əldə etdiyi iqtisadi artım, eyni zamanda, iqtisadi inkişaf üçün yeni imkanların yaradılması bu ili uğurlu il etdi. Bu da təbii ki, növbəti illərdə iqtisadi inkişafın dərinləşməsi ilə bağlı yeni imkanlar yaradır.

“Ötən il Qarabağın, Şərqi Zəngəzurun da bərpa və yenidən qurulması işləri davam etdirildi. İndiyədək Qarabağın, Şərqi Zəngəzurun bərpasına 19 milyard manata yaxın vəsait ayrılıb. Bu il büdcədən ən azı 4 milyard manat vəsaitin ayrılacağı da nəzərə alınarsa, bu, o deməkdir ki, Zəfərdən sonra ümumilikdə işğaldan azad olunmuş ərazilərimizin bərpasına 23 milyard manat vəsaitin ayrılması həyata keçiriləcək. Bu da təbii ki, Azərbaycanın iqtisadi gücünü göstərən əsas amillərdən biridir.

“Qeyd etmək lazımdır ki, bu cür böyük yenidənqurma və bərpa işlərinin fonunda Azərbaycan öz valyuta ehtiyatlarını daha da artırdı. Bu isə bütövlükdə iqtisadi təhlükəsizliyin güclənməsinə təkan verdi. Eyni zamanda, Azərbaycan xarici borcun ÜDM-dəki payına görə dünyada ən yaxşı göstəriciyə malik ölkələr siyahısında ilk onluqdadır və xarici borcun ÜDM-dəki pay birrəqəmlidir - 7,12 faiz. Bundan başqa, Azərbaycanın valyuta ehtiyatları onun ÜDM-i qədərdir və xarici borc öhdəliyindən 14 dəfə çoxdur”, - deyə V.Bayramov əlavə edib.

Deputat vurğulayıb ki, 2025-ci ilin dövlət büdcəsi müstəqilik dövründəki ən böyük büdcə olacaq. Büdcədən bu il ərzində 41,4 milyard manat vəsaitin xərclənməsi nəzərdə tutulur. Bu isə iqtisadiyyatdakı islahatların dərinləşməsini və dəstəklənməsini, sahibkarlar üçün yeni imkanların yaradılmasını, eyni zamanda, prioritet istiqamətlərə daha çox vəsaitin ayrılmasını təmin edəcək. Bütövlükdə müdafiə qabiliyyətinin gücləndirilməsi üçün 8,4 milyard manat vəsait ayrılacaq, sosial istiqamətlərə 16,19 milyard manat, Qarabağ və Şərqi Zəngəzurun qurulmasına 4 milyard manat vəsaitin ayrılması nəzərdə tutulur. Bu baxımdan 2025-ci ilin dövlət büdcəsinin parametrləri Azərbaycanda həyata keçirilən iqtisadi və sosial siyasətin prioritetlərinə tam uyğundur və praktik olaraq bu sahədə siyasətin daha da inkişaf etməsinə imkan verəcək.

“Bu il biz 5-ci sosial paketin icrasını müşahidə edirik. Artıq sosial paketin icrasına başlanıb və yanvar ayından etibarən minimum əməkhaqqı 16 faiz artaraq 345 manatdan 400 manata çatdırılıb. Eyni zamanda, ehtiyac meyarının həddi 285 manata çatdırılıb. Gələn aydan etibarən isə minimum pensiyada da artım olacaq. Bundan başqa, bir sıra dövlət qurumlarında çalışan işçilərin əmək haqlarının 15 faiz artırılması ilə bağlı Prezident tərəfindən yanvarın 7-də Sərəncam imzalandı. Nəticə etibarilə, görülən bu tədbirlər deməyə əsas verir ki, növbəti aylarda Azərbaycanda sosial rifah daha da yaxşılaşacaq”, - deyə Vüqar Bayramov bildirib.