Cənubi Koreyada dağ meşələrində güclü yanğın başlayıb
Bakı, 4 aprel, AZƏRTAC
Cənubi Koreyanın Qanvon vilayətində dağ meşələrində güclü yanğın baş verib.
AZƏRTAC Yonhap agentliyinə istinadla xəbər verir ki, yanğın Şimali Koreya ilə sərhəd bölgədəki Qoson şəhərində yerli vaxtla 19:17-də (Bakı vaxtı ilə 14:17) başlayıb. Qısa müddətdə geniş əraziyə yayılan yanğını söndürmək üçün paytaxt Seul da daxil olmaqla ölkənin digər bölgələrindən əlavə qüvvələr cəlb olunub.
Cənubi Koreyanın Milli Yanğından Mühafizə Agentliyinin məlumatına əsasən, ərazidə 4 qəsəbədə yaşayan əhali təxliyə edilib. Hələlik yanğının söndürülməsi səyləri bir nəticə verməyib.
Bildirilir ki, bu, gün ərzində Qanvon vilayətində dağ-meşə zonasında baş verən ikinci yanğındır. Günortadan bir qədər sonra İnce qəsəbəsi yaxınlığında yerləşən dağ meşələrində yanğın baş verib. Yanğınsöndürənlər hələlik həmin yanğını da nəzarətə ala bilməyiblər. Güclü külək yanğının genişlənməsinə səbəb olub.
İnsan tələfatı barədə məlumat yoxdur.
Bölmənin digər xəbərləri
