SİYASƏT
Cəzasızlıqdan ruhlanan Ermənistanın cinayətkar rejimi bu gün də çirkin əməllərini davam etdirir - QHT sədri

Bakı, 18 iyul, AZƏRTAC
Son günlər Ermənistanın dağ-mədən sənayesi ilə bağlı fəaliyyəti Azərbaycan ictimaiyyətinin ciddi narahatlığına və etirazlarına səbəb olub. Məlumdur ki, insanlığa və təbiətə zidd olan bu fəaliyyət Yer kürəsinin ekosisteminə də ziyan vurur. Bu proses yalnız regional mahiyyət daşımır, təkcə Ermənistanın özünün ətraf mühiti və əhalisi üçün təhlükəli deyil, həm də qonşu ölkələr üçün ciddi təhlükə yaradır. Özünü dünyaya “qədim xalq” kimi sırıyan bu toplum hələ də orta əsrlərdə və onlardan əvvəl yaşamış vəhşi barbar tayfalara xas davranış sərgiləyir. Bu əməllər həm insanlara, həm tarixi və mədəniyyət abidələrinə, həm də ətraf mühitə, flora və faunaya qarşı törədilir.
Bu sözləri AZƏRTAC-a açıqlamasında Cəmiyyətin İnkişafı Mərkəzi İctimai Birliyinin sədri Əhməd Abbasbəyli söyləyib.
Ə.Abbasbəyli diqqətə çatdırıb: “Ola bilər ki, Ermənistan ətraf mühitə, öz vətəndaşlarının sağlamlığına laqeyddir. Amma biz, Azərbaycan ictimaiyyəti qlobal ekoloji fəlakətə səbəb olan cinayətkar əməllərə laqeyd qala bilmərik. Ermənistanın Azərbaycanla sərhəd bölgəsində davam edən mədən “əməliyyatları” ilə bağlı yaranmış təhlükə insanlara və ətraf mühitə zərər verir, yüksək zəhərli kimyəvi tullantılar demək olar bütün transsərhəd suları çirkləndirir, floraya, faunaya, torpaq, hava və su strukturlarına dağıdıcı təsir göstərir, ekosistemin deqradasiyasına səbəb olur. Azərbaycan tərəfinin əlində deyilənlərlə bağlı kifayət qədər sübutlar və əsaslandırılmış faktlar var. Bunun ən birinci sübutu kimi məhz 30 illik işğal dövründə Şərqi Zəngəzur və Qarabağda törədilmiş vəhşilikdir. Vətəndaşlarımızın daşı-daş üstə qalmayan ev-eşikləri, tarixi və mədəniyyət abidələri bir yana, hətta meşələrimiz də qırılıb, çaylarımız da çirkləndirilib, fauna tamamilə məhv edilib. Cəzasızlıqdan ruhlanan Ermənistanın cinayətkar rejimi bu gün də öz çirkin əməllərini davam etdirir, Qafan dağ-mədən kompleksində, Göyçə Daşdəm qızıl mədənində, Axtala mədənində, Qafan manqan zavodunda, Ellər (Qotayq) metallurgiya zavodunda, Amuldağ (Amulsar) qızıl yatağında və digər yerlərdə aparılan əməliyyatlar transsərhəd suları çirkləndirir, sərhədyanı ərazilərdə yoluxucu xəstəliklərin yayılma riskini artırır”.
Bu gün əsas məqsədin Birləşmiş Millətlər Təşkilatının, Avropa İttifaqının, digər nüfuzlu təşkilatların və beynəlxalq ictimaiyyətin diqqətini bu problemə cəlb etmək olduğunu bildirən QHT sədri deyib: “Ermənistan bu əməlləri ilə BMT-nin “Transsərhəd su axarlarının və beynəlxalq göllərin mühafizəsi və istifadəsi haqqında” Konvensiyasının, “Su və sağlamlıq haqqında” Protokolunun, “Avropa İqtisadi Komissiyasının Təhlükəli tullantıların transsərhəd daşınmasına və utilizasiyasına nəzarət” haqqında Bazel Konvensiyasının, “Transsərhəd kontekstdə ətraf mühitə təsirin qiymətləndirilməsi üzrə Avropa İqtisadi Komissiyası” Konvensiyasının tələblərini, BMT-nin Dayanıqlı İnkişaf Məqsədlərini, Biznes və İnsan Hüquqları üzrə BMT-nin Rəhbər Prinsiplərini kobud şəkildə pozaraq, saymamazlıq nümayiş etdirir”.