‘ÇILĞIN QAZKONİYALI’... ARTIQ BAKIDADIR
Görkəmli bəstəkar, SSRİ xalq artisti, Sosialist Əməyi Qəhrəmanı, akademik Qara Qarayevin yaradıcılığında ideya-fəlsəfi məzmun əsas yer tutur. İnsanın gözəllik uğrunda mübarizəsi onun musiqisinin əsas mövzusudur. Milli musiqi ilə klassik və müasir musiqi üslublarının üvzü birliyi, mövzuların romantik şərhi ölməz sənətkarın yaradıcılığına xas olan cəhətlərdəndir. İyunun 23-də Dövlət Musiqili Komediya Teatrında görkəmli bəstəkarın 85 illik yubileyi ilə əlaqədar “Çılğın qazkoniyalı” operettasının ilk tamaşı göstərilmişdir. Teatrdan AZƏRTAC-ın müxbirinə demişlər ki, Qara Qarayevin E.Rostanın “Sirano de Berjerak” pyesinin motivləri üzrə yazdığı və ilk dəfə ölkəmizdə tamaşaya qoyulan iki hissəli operettanın quruluşçu rejissoru xalq artisti Cənnət Səlimova, quruluşçu dirijoru “Qızıl Dərviş” mükafatı laureatı Nazim Hacıəlibəyov, quruluşçu rəssamı əməkdar rəssam, “Qızıl Dərviş” mükafatı laureatı İsmayıl Məmmədovdur. Tamaşada baş rolları rus turuppasının aktyorları - əməkdar artist Elxan Əhədzadə (Sirano de Berjerak), Larisa Vinoqradova (Roksana), Firuz Məmmədov (Kristian), Fərid Əliyev (Raqno), Emil Heydərov (Monfleri), əməkdar artist Boris Qarfkin (Liner) və başqaları oynamışlar. Prezidentin İcra Aparatının humanitar siyasət şöbəsinin müdiri Fatma Abdullazadə, mədəniyyət naziri Polad Bülbüloğlu və başqa rəsmi şəxslər tamaşada olmuşlar.
Bölmənin digər xəbərləri
