“China Siwei”: Çinin hazırda kosmosda 350-dən çox peyki var və ölkəmiz beynəlxalq əməkdaşlıqlara hazırdır
Bakı, 24 aprel, AZƏRTAC
Çin kosmik sahədə yüksək texnologiyaların inkişafında çox böyük irəliləyiş edib. Artıq fəzada Çinə məxsus 230-dan çox kommersiya peyki var. Ümumilikdə, Çinin hazırda kosmosda 350-dən çox peyki var. Ölkəmiz beynəlxalq əməkdaşlıqlara çox önəm verir.
AZƏRTAC xəbər verir ki, bunu Çinin “China Siwei” şirkətinin Marketinq departamentinin rəhbəri Guang Hu Bakıda keçirilən Kosmik Texnologiyalar Konfransı (STC2025) çərçivəsində “Regional çağırışlar üçün peyk texnologiyalarının rolu” adlı panel sessiyada çıxışında deyib.
“Çin 2025-ci ildə kosmik proqramını genişləndirərək yeni pilotlu missiyalar və Ay tədqiqatları istiqamətində mühüm addımlar atacaq. 2025-ci ildə ikipilotlu missiya və bir yük daşıyan missiya planlaşdırılır. Çin 2030-cu ilə qədər astronavtları Aya göndərməyi hədəfləyir. Bu məqsədlə “Long March-10” raketi, “Mengzhou” ekipaj modulu və “Lanyue” Ay eniş aparatı kimi əsas texnoloji komponentlər hazırlanır. Hainan adasındakı Vençan buraxılış mərkəzində test və buraxılış infrastrukturu genişləndirilir. Eləcə də, Çin beynəlxalq əməkdaşlığı gücləndirərək Pakistan ilə ilk rəsmi razılaşmanı imzalayıb. Belə ki, pakistanlı astronavtlar Çin kosmik missiyalarında hazırlıq prosesində iştirak edəcəklər. Bu addım Çinin kosmosun beynəlxalq inkişafına töhfə vermək istədiyini göstərir. Çin kosmik sahədə bir sıra dövlətlərlə əməkdaşlıq edir və gələcək səmərəli kollaborasiyalara açıqdır. Xüsusilə, Avrasiya regionunda bu sahədə birgə layihələrin icrasına dəstək verməyə daim hazırıq”, - deyə Guang Hu əlavə edib.
Bölmənin digər xəbərləri
