COST proqramının layihələri üzrə maarifləndirici videomateriallar hazırlanıb
Bakı, 2 noyabr, AZƏRTAC
Avropa Komissiyasının COST (Elm və Texnologiyada Avropa Əməkdaşlığı) proqramı üzrə layihələrində iştirak alim və mütəxəssislər üçün elmi konsorsiumların yaradılması ilə yanaşı, elm, təhsil və istehsal sahələri arasında əlaqələrin genişləndirilməsi və elmin populyarlaşdırılması üçün imkanlar yaradır. Bu proqram çərçivəsində “Bitkilərdə mikroelement metabolizmi” mövzusunda layihə üzrə elmi məlumatların daha geniş auditoriyaya çatdırılması istiqamətində maarifləndirici videomateriallar hazırlanıb. AMEA-nın Rəyasət Heyəti aparatının Beynəlxalq elmi əməkdaşlıq şöbəsinin müdiri biologiya üzrə fəlsəfə doktoru, dosent Esmira Əlirzayeva layihənin 5-ci işçi qrupunun İsveçrənin Sürix şəhərində keçirilən toplantısına qatılıb və qeyd edilən videomaterialların müəlliflərindən biri kimi onun hazırlanmasında iştirak edib.
Bu barədə AZƏRTAC-a AMEA-dan məlumat verilib. Bildirilib ki, müasir dövrdə aktual problemlərdən olan mikroelementlərin canlı orqanizmlər üçün əhəmiyyəti, bitki-torpaq əlaqələrində onların çatışmazlığı və toksikliyinə həsr edilmiş “Metallar, bitkilər və insanlar” adlı birinci 3 dəqiqəlik qısa videomaterial artıq hazırlanaraq məktəblilər də daxil olmaqla, geniş izləyici auditoriyasının istifadəsinə verilib. Videomaterialla AMEA-nın saytındakı linkdən tanış olmaq olar.
Yeddi dəqiqəlik ikinci videomaterial da tamamlanmaq üzrədir, bu materialda mikroelementlərin təyini və analizi üzrə elmi tədqiqatlar, istifadə edilən müasir metod və avadanlıqlar haqqında məlumata yer verilib.
Bölmənin digər xəbərləri
