COVID-19-a qarşı mübarizə üçün Yaponiya hökuməti İrana 6 milyon dollar vəsait ayırıb
Tehran, 26 oktyabr, AZƏRTAC
Koronavirusla mübarizəni daha da səmərəli etmək üçün Yaponiya hökuməti İrana 6,3 milyon dollar vəsait ayırıb.
AZƏRTAC xəbər verir ki, bu barədə Yaponiyanın İrandakı səfirliyindən bildiriblər. Ayrılan vəsaitə kompüter tomoqrafiya aparatı alınaraq əyalət xəstəxanalarına təqdim olunacaq.
İranın Səhiyyə Nazirliyinin verdiyi məlumata görə son sutka ərzində ölkədə 9 min 96 nəfər koronavirusa yoluxub, 125 nəfər isə yoluxaraq həyatını itirib. Bununla da İranda virusa yoluxanların ümumi sayı 5 milyon 877 min 456 nəfərə, bu xəstəlikdən ölənlərin ümumi sayı isə 125 min 519-a çatıb.
Ölkə üzrə müxtəlif xəstəxanalarda müalicə alan 4 min 184 xəstənin vəziyyəti ağır olaraq qalır. Eyni zamanda 5 milyon 443 min 243 nəfər sağalaraq evə buraxılıb.
Rabil Kətanov
AZƏRTAC-ın xüsusi müxbiri
Tehran
Bölmənin digər xəbərləri
