Stokholm, 11 sentyabr, Nərgiz Cəfərli, AZƏRTAC

Danimarkanın gündəlik “Jyllands-Posten” qəzetində Azərbaycan Respublikasının Norveç, İsveç, Finlandiya və Danimarkadakı səfiri Zaur Əhmədovun Ermənistanla Azərbaycan arasında sülh prosesi ilə bağlı məqaləsi dərc olunub.

AZƏRTAC xəbər verir ki, məqalədə Z.Əhmədov Ermənistanla Azərbaycan arasında 30 ildən çox davam edən münaqişə nəticəsində Azərbaycanın beynəlxalq səviyyədə tanınmış ərazisinin 20 faizinin Ermənistan tərəfindən işğal edildiyi və bunun BMT Təhlükəsizlik Şurası tərəfindən pisləndiyi xatırladılıb.

Səfir məqalədə vurğulayır ki, Azərbaycan 2020-ci ildə ərazi bütövlüyünü bərpa edərək Qarabağın erməni sakinlərini çoxmillətli və multikultural respublikanın tərkibində qalmağa dəvət edib, lakin onlar Ermənistana köçməyə üstünlük veriblər. Qeyd olunub ki, 1980-ci illərin sonunda isə 250 minə yaxın azərbaycanlı bu ölkədən qovulmuşdu.

Z.Əhmədovun sözlərinə görə, Azərbaycanın ərazi bütövlüyünün bərpası Ermənistanla Azərbaycan arasında sülh sazişinin imzalanacağı təqdirdə Cənubi Qafqazda firavanlıq və sabitlik, Ermənistanla Türkiyə arasında münasibətlərin normallaşması üçün böyük imkanlar açır. Lakin 2020-ci ildə atəşkəsdən dərhal sonra Azərbaycanın təklif etdiyi sazişin imzalanmasına Ermənistan Konstitusiyasına daxil edilmiş Azərbaycana qarşı ərazi iddiaları mane olur.

Məqalədə səfir Avropa Sülh Fondundan sui-istifadə edərək Ermənistanı silahlandıran, bununla da sülh prosesini təhdid edən Fransa və bəzi digər ölkələrin siyasətinə də toxunur.

“Biz hesab edirik ki, beynəlxalq ictimaiyyət bu cür militarizasiyadan çəkinməli, əvəzində sülh prosesini təşviq etməli və Şimali Əməkdaşlıq modelindən nümunə götürərək regional əməkdaşlığı gücləndirməlidir. Belə yanaşma Cənubi Qafqazı sabitlik və firavanlıq regionuna çevirər. Azərbaycan bu məqsədə tam sadiqdir”, - deyə Zaur Əhmədov qeyd edib.