Daşkənddə tapılan IX-XIX əsrlərə aid xəzinə tarix muzeyinə təhvil verilib
Daşkənd, 4 iyul, AZƏRTAC
Özbəkistan Milli Universitetinin məzunu Muxammadbobur Yusupov bu günlərdə Daşkəndin mərkəzindəki köhnə tikilidə IX-XIX əsrlərə aid aşkar etdiyi xəzinəni Özbəkistan Dövlət Tarix Muzeyinə təhvil verib.
AZƏRTAC Özbəkistan mətbuatına istinadla xəbər verir ki, xəzinədə tarixi və mədəni dəyəri olan 92 adda qiymətli kitab, 71 qızıl, gümüş və bürünc sikkə, türk, alman, ingilis, fransız, ərəb dillərində qədim tarixi, dini kitablar və əlyazmalar, tarixi sənədlər, ikonalar var.
Xəzinədə, həmçinin IX-XIX əsrlərdə Türküstan ərazisində, XVIII əsr və XX əsrin əvvəllərində Avropa ölkələrində hazırlanan döymə əşyalar, Buxara Əmiri Əlimxan dövrünə aid əlyazmalar, Avropa və Asiya qitələrinə aid nadir mənbələr də var. Hazırda mütəxəssislər xəzinənin qiymətləndirilməsi istiqamətində iş aparırlar.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
