Deputat: Azərbaycan ilə Çin arasında səmərəli əməkdaşlıq üçün çox möhkəm siyasi platforma qurulub
Bakı, 25 aprel, AZƏRTAC
Tarixin bütün mərhələlərində dünyada öz yeri, mövqeyi olan ölkə kimi diqqəti cəlb edən Çinlə Azərbaycan arasında əlaqələrin yaranması coğrafi uzaqlığa baxmayaraq, eramızdan əvvələ təsadüf edir. Azərbaycan-Çin mədəni əməkdaşlığının tarixi mənzərəsinə nəzər saldıqda sovet dövründə də bu əlaqələrin xüsusi ardıcıllıqla həyata keçirildiyinin şahidi oluruq. Çağdaş dövrdə isə ölkələrimiz siyasi, iqtisadi, ticarət, enerji, mədəniyyət, kənd təsərrüfatı, turizm, təhsil kimi sahələrdə yüksək səviyyədə əməkdaşlıq əlaqələri formalaşıb.
Bu fikirləri AZƏRTAC-a açıqlamasında Milli Məclisin deputatı Anar Məmmədov deyib.
Müasir Azərbaycan-Çin münasibətlərinin tarixinin 1991-ci ildən başladığını qeyd edən deputat bildirib ki, Çin Xalq Respublikası ölkəmizin müstəqilliyini ilk tanıyan dövlətlərdəndir. Çinlə Azərbaycan arasında diplomatik münasibətlər isə 1992-ci il aprelin 2-də qurulub. Azərbaycan xalqının Ümummilli Lideri Heydər Əliyevin 1994-cü ilin martında Çinə rəsmi səfəri isə bugünkü münasibətlərin dayanıqlı təməlini qoyub. Ulu Öndərin Çinə uğurlu səfərindən sonra iki ölkə arasında ikitərəfli münasibətlər daha da möhkəmlənərək, daha sürətli inkişaf mərhələsinə qədəm qoyub.
“Hazırda Azərbaycan-Çin münasibətlərinin uğurlu inkişafı hər iki ölkənin dövlət başçısının ortaq siyasi iradəsi ilə bağlıdır. Şərq-Qərb qarşılıqlı əlaqələrində bağlayıcı həlqə kimi mühüm geostrateji əhəmiyyətə malik olan Azərbaycan Çin ilə hərtərəfli əlaqələr qurub və bu əlaqələr daim artan dinamika üzrə inkişaf etməkdədir. Qarşılıqlı inam, hörmət, etimad, bərabərhüquqlu əməkdaşlıq və qarşılıqlı dəstək kimi ikitərəfli münasibətlər üzərində qurulan bu əməkdaşlıq dövlətimizin başçısının Çinin Sinxua agentliyinə verdiyi müsahibəsində qeyd etdiyi kimi, hər iki ölkənin strateji maraqlarına uyğundur. Prezident İlham Əliyev müsahibədə Azərbaycanla Çin arasında strateji tərəfdaşlıq haqqında Birgə Bəyannaməyə istinad edərək bildirib ki, bu sənədlə Azərbaycan və Çin bir-birinin suverenliyinə və ərazi bütövlüyünə layiqli hörmətlə yanaşan, daxili işlərə qarışmamaq və dinc yanaşı yaşamaq prinsiplərindən irəli gələn müstəqil xarici siyasət yürüdən vacib, etibarlı tərəfdaşlar olduqlarını təsdiqləyiblər. Azərbaycan Liderinin bu müsahibəsi ümumilikdə iki ölkə arasındakı əlaqələrin inkişafını, strateji tərəfdaşlığın əhəmiyyətini və perspektivlərini ətraflı şəkildə əks etdirir”, - deyə A.Məmmədov vurğulayıb.
Deputatın sözlərinə görə, Azərbaycanla Çin arasında münasibətlər “Bir kəmər, bir yol” layihəsi və ticari-iqtisadi əlaqələrlə yanaşı, digər sahə və istiqamətlərdə də sürətlə inkişaf edir. Ticari-iqtisadi və tranzit-logistika layihələrinin reallaşdırılması ilə yanaşı, elm, texnika, texnologiya, İTK, rəqəmsallaşdırma, eləcə də mədəni-humanitar sahələrdə də fəaliyyətin genişlənməsi xarakterikdir. Bu baxımdan görünən odur ki, yaxın perspektivdə Azərbaycanla Çin arasında ticari-iqtisadi və logistika sahəsindəki əlaqələrlə yanaşı, adıçəkilən sahələrdə də səmərəli fəaliyyət intensivləşəcək.
İkitərəfli münasibətlərdə iqtisadi məsələlərin xüsusi yer tutduğunu diqqətə çatdıran A.Məmmədov bildirib ki, 2024-cü ildə iki ölkə arasında əmtəə dövriyyəsi 20,7 faiz artaraq 3,744 milyard dollara çatıb. Çin Azərbaycanın 4-cü ən böyük ticarət tərəfdaşına çevrilib və ölkəmizin ümumi xarici ticarət dövriyyəsində 7,9 faiz paya malikdir. İdxalda isə Çin 17,69 faizlə lider mövqedədir. Hazırda Azərbaycanda Çin kapitalı ilə yaradılmış 375 şirkət mövcuddur, onlardan 298-i aktiv fəaliyyət göstərir. Eyni zamanda, yüksək texnologiyalar, innovasiyalar və alternativ enerji sahələrində birgə layihələrin reallaşdırılması istiqamətində danışıqlar davam etdirilir.
“Bütövlükdə bu gün Azərbaycan ilə Çin arasında səmərəli əməkdaşlıq üçün çox möhkəm siyasi platforma qurulub. Prezident İlham Əliyevin Çinə dövlət səfəri, Çin Lideri Si Cinpinlə görüşü, iki ölkə arasında hərtərəfli strateji tərəfdaşlıq əlaqələrinin qurulması dünyanın diqqət mərkəzindədir. Dövlətimizin başçısının Çinə səfəri ölkələrimiz arasında bütün sahələrdə əməkdaşlıq əlaqələrini daha da dərinləşdirəcək, qarşılıqlı təmaslar və dialoq daha da intensivləşəcək, ikitərəfli münasibətlər yeni məzmun və keyfiyyət qazanacaq”, - deyə Anar Məmmədov fikirlərini yekunlaşdırıb.
Bölmənin digər xəbərləri
