Bakı, 16 sentyabr, AZƏRTAC

Sentyabrın 16-da Azərbaycan Milli Elmlər Akademiyası Nəsimi adına Dilçilik İnstitutunda fəlsəfə doktoru hazırlığı üzrə doktoranturaya qəbul imtahanı keçirilib.

İnstitutdan AZƏRTAC-a bildirilib ki, imtahan prosesi Ali Attestasiya Komissiyasının tələblərinə uyğun olaraq təşkil edilib. Müvafiq ixtisaslar üzrə komissiya üzvləri imtahan prosesini izləyib. Komissiyanın sədri, elmi müəssisənin baş direktoru professor Nadir Məmmədli gənclərə uğurlar diləyib.

Xarici dil və fəlsəfə imtahanlarından uğurla keçən 8 iddiaçı Azərbaycan dili, türk dilləri və dil nəzəriyyəsi ixtisasları üzrə təqdim olunan test tapşırıqlarını verilən vaxt ərzində həll ediblər. İddiaçiların imtahan nəticələri komissiya üzvləri tərəfindən “yaxşı” və “əla” qiymətləndirilib.