Bakı, 25 yanvar, AZƏRTAC

Şuşa Azərbaycanın xüsusi milli memarlıq abidələri, tarixi şəxsiyyətləri, görkəmli elm, mədəniyyət incəsənət xadimləri, ecazkar təbiəti, müalicəvi suları, özünəməxsus mətbəxi və adət-ənənəsi ilə seçilən dilbər guşəsidir. Ölkə rəhbəri tərəfindən bu il Azərbaycanın mədəniyyət paytaxtı elan olunan Şuşa həm də özünün sənətkarlıq, xalçaçılıq nümunələri və sənətkarları ilə də şöhrət qazanıb. Şuşa Qarabağın inzibati mərkəzi olmaqla yanaşı, həm də çox mühüm iqtisadi mərkəz idi.

Bu fikirləri AZƏRTAC-a açıqlamasında Azərbaycan Turizm və Menecment Universitetinin Turizm biznesi kafedrasının müdiri dosent Hafiz Hüseynov söyləyib. O bildirib ki, otuz ilə yaxın düşmən tapdağı altında olmasına baxmayaraq, hər bir azərbaycanlının ürəyi daim Şuşa ilə döyünüb. Hamımız o günün gələcəyinə, Şuşanın işğaldan azad ediləcəyinə əmin idik və inanırdıq. Nəhayət rəşadətli Azərbaycan əsgəri Şuşanı işğaldan azad etdi. 2020-ci il noyabrın 8-i hər bir azərbaycanlı üçün qürur günü oldu, Şuşamıza geri qayıtdıq.

“Şuşasız Qarabağ, Qarabağsız isə ümumiyyətlə Azərbaycan yoxdur” deyən ümummilli lider Heydər Əliyev Şuşanın ölkəmiz üçün dəyərini bu sözlərlə ifadə etmişdi. Prezident İlham Əliyev Şuşanın azad olunması xəbərini elan edəndə “Şuşa təkcə şuşalılar üçün yox, bütün azərbaycanlılar üçün, Vətənini, millətini sevən hər bir vətəndaşımız üçün əziz şəhərdir, əziz bir torpaqdır, əziz bir qaladır, əziz bir abidədir” dedi.

Şuşa işğaldan azad olunandan sonra şəhərdə infrastrukturun qurulması ilə yanaşı, tarix və mədəniyyət abidələrinin bərpasına başlanıldı, həmçinin ölkə əhəmiyyətli mühüm tədbirlər məhz burada keçirildi. Azərbaycan Respublikasının Prezidenti İlham Əliyevin təşəbbüsü və Heydər Əliyev Fondunun təşkilatçılığı ilə 2021-ci il mayın 13-14-də Şuşanın Cıdır düzündə “Xarıbülbül” musiqi festivalının keçirilməsi hamımıza böyük qürur və sevinc hissləri yaşatdı. Festivalın ilk günündə ölkəmizdə yaşayan müxtəlif xalqların musiqi yaradıcılığı “Azərbaycan musiqisində multikulturalizm” mövzusunda təqdim edildi. Ölkəmizin müxtəlif bölgələrində yaşayan ayrı-ayrı xalqların musiqi qrupları və ifaçıları festivalda öz çıxışları ilə Azərbaycanın millətindən, dinindən asılı olmayaraq hər bir kəsin vahid Vətəni olduğu mesajını bütün dünyaya çatdırdılar.

Ötən il iyunun 15-də isə Şuşada daha bir əlamətdar hadisəyə imza atıldı, “Azərbaycan Respublikası ilə Türkiyə Respublikası arasında müttəfiqlik münasibətləri haqqında Şuşa Bəyannaməsi” imzalandı.

2021-ci il avqustun 29-da Prezident İlham Əliyev və birinci xanım Mehriban Əliyeva Molla Pənah Vaqifin muzey-məqbərə kompleksinin təmir-bərpa və yenidənqurma işlərindən sonra açılış mərasimində iştirak etdilər. Həmçinin avqustun 30-da Azərbaycan Respublikasının Prezidenti İlham Əliyev və birinci xanım Mehriban Əliyevanın iştirakı ilə Şuşada Vaqif Poeziya Günlərinin rəsmi açılışı oldu.

Prezident İlham Əliyev yanvarın 5-də “Azərbaycan Respublikasında 2022-ci ilin “Şuşa İli” elan edilməsi haqqında” Sərəncam imzaladı. Sərəncamda qeyd olunduğu kimi, Qarabağın tacı olan Şuşa xalqımız üçün müqəddəs və əziz məkandır. Şuşa sevgisi hər bir azərbaycanlının mənəvi varlığının ayrılmaz parçasıdır. Təməli 1752-ci ildə Qarabağ xanı Pənahəli xan tərəfindən qoyulan və bu il 270 illiyi qeyd olunacaq Şuşa şəhəri zəngin inkişaf yolu keçmiş, Azərbaycanın və bütün Cənubi Qafqazın mədəni və ictimai-siyasi həyatında müstəsna rol oynamışdır. Bənzərsiz tarixi görkəmini və formalaşdırdığı özünəməxsus mühiti həmişə qoruyub saxlayan bu şəhər yetirdiyi böyük şəxsiyyətləri ilə ədəbi, mədəni, elmi və ictimai fikir salnaməmizə əlamətdar səhifələr yazmışdır.

“Azərbaycanda “Şuşa İli” kimi qeyd olunan bu əlamətdar tarixin, günlərin şahidi olmaq, bu gözəl hissləri yaşamaq qürurvericidir. Çünki Şuşa əvvəlki şöhrətinə və xoşbəxt həyatına qayıtmaq yolundadır”, - deyə Hafiz Hüseynov fikrini yekunlaşdırıb.