Bakı, 30 yanvar, AZƏRTAC

2017-ci ildə Dövlət Enerji Nəzarəti İdarəsinin regional bölmələrinin əməkdaşları tərəfindən 1320 inzibati protokol tərtib edilib.

AZƏRTAC xəbər verir ki, bu barədə Energetika Nazirliyinin 2017-ci il üzrə “Yanacaq-energetika kompleksində fəaliyyətə dair” hesabatında deyilir.

Bildirilir ki, ötən il ərzində nazirliyin Dövlət Enerji Nəzarəti İdarəsi tərəfindən dövlət elektroenergetika və enerjitəchizatı müəssisələrində, elektrik enerjisi istehlakçılarında 634 texniki, 84 təkrar, 8 kompleks araşdırma və digər araşdırmalar aparılıb. O cümlədən istehlakçılarda elektrik qurğularının texniki istismar, təhlükəsizlik texnikası qaydalarına əməl olunmasının və enerjidən istifadənin vəziyyəti araşdırılıb, mövcud qaydalara əməl edilmədən, texniki sənədləşmə aparılmadan şəbəkəyə qoşulmuş enerji qurğuları aşkar edilib, şikayət məktubları araşdırılıb. Həmçinin Nazirlər Kabinetinin müvafiq Sərəncamının icrası təmin edilib, Energetika Nazirliyinin “Enerjisistemdə elektrik gücü və enerjisi çatmadıqda istehlakçıların məhdudiyyət və birbaşa açılma qrafiklərinin tərtib və tətbiqi qaydaları haqqında” təlimatının icrasına nəzarət olunub, Nazirlər Kabinetinin tapşırığına əsasən əhalinin və iqtisadiyyatın bütün sahələrinin elektrik enerjisi təchizatında baş vermiş fasilələr araşdırılıb.

2017-ci il üçün Energetika Nazirliyinin təsdiq etdiyi iş planına əsasən “Azərenerji” və “Azərişıq” ASC-nin nümayəndələrinin iştirakı ilə Mingəçevir SESS, Şəmkir SESS, 110/35/10 kilovoltluq “Yevlax”, “Günəşli”, “Tüklə”, “Binə”, “Gəncə III”, “Xudat”, “Şahdağ”, “ETK-4”, “Tovuz”, “8–ci kilometr”, “Xudat”, “Yasamal-1” 24 yarımstansiyalarında elektrik qurğularında avadanlıqların texniki istismar, təhlükəsizlik texnikası və yanğın təhlükəsizliyi qaydalarına əməl olunmasının vəziyyəti üzrə araşdırmalar aparılıb və müvafiq aktlar tərtib edilib. Aparılmış araşdırmalar zamanı aşkar edilmiş nöqsanların aradan qaldırılması üçün müvafiq tədbirlər həyata keçirilib.

İl ərzində Dövlət Enerji Nəzarəti İdarəsinin regional bölmələrinin əməkdaşları tərəfindən 1320 inzibatı protokol tərtib edilərək, 119 min 190 manat məbləğində cərimə tətbiq edilib ki, bu məbləğdən 110 min 830 manatın ödənilməsi təmin olunub.

İdarə tərəfindən aparılmış araşdırmalar nəticəsində 2017-ci il ərzində “Azərişıq” ASC-nin regional bölmələri üzrə ümumilikdə 108 obyektin gücü 2662,0 kilovolt və 35872 kilovolt-amper olmaqla “Elektrik enerjisindən istifadə Qaydaları”nın tələblərini pozaraq, texniki sənədləşdirmə aparılmadan elektrik şəbəkələrinə qoşulduğu aşkar olunub. Pozuntularla elektrik şəbəkələrinə qoşulmuş obyektlər barəsində tədbir görülməsi, o cümlədən onlara elektrik enerjisi verilişinin dayandırılması barədə Dövlət Enerji Nəzarəti İdarəsinin regional bölmələri tərəfindən enerjitəchizatı müəssisələrinə tələbnamələr verilmiş və müraciətlər edilib.

Ötən il pozuntu halı aşkar edilmiş 108 obyektdən 27 obyektin fəaliyyəti dayandırılıb, 74 obyekt sonradan sənədləşdirilib, 5 istehlakçının elektrik qurğu və avadanlıqlarının istismarına qadağalar qoyulub. Obyektlərin qaydalara əməl edilmədən qoşulmasına görə onların məsul şəxslərinə və enerjitəchizat müəssisələrinin vəzifəli şəxslərinə qarşı İnzibati Xətalar Məcəlləsinin müvafiq maddəsinə uyğun inzibati cərimələr tətbiq edilib.

Azərbaycan Respublikası Energetika Nazirliyinin təsdiq etdiyi iş planına uyğun olaraq Dövlət Enerji Nəzarəti İdarəsinin regional bölmələri tərəfindən enerjisistemin dayanıqlı və etibarlı işləməsinin təmin edilməsi ilə əlaqədar “Azərişiq” ASC-nin Regional Enerji Təchizatı və Satışı İdarələrində 2017-ci il üzrə baş vermiş qəza və işdə imtinalar araşdırılıb. Keçən il üzrə Energetika Nazirliyinə və bilavasitə Dövlət Enerji Nəzarəti İdarəsinə daxil olmuş 235 şikayət ərizəsi aidiyyəti üzrə regional bölmələrə göndərilib, həmin bölmələr tərəfindən vaxtında icrasının təmin olunmasına nəzarət edilib və nəticələri barədə tərtib edilmiş sənədlərin müvafiq qanunların, qaydaların tələblərinə uyğun hazırlanması yoxlanılıb. Bunlardan 126 müraciət müsbət, 50 müraciət qismən həll olunub, 42 müraciət əsassız sayılıb, 20 müraciət isə icraatdadır.

Dövlət Enerji Nəzarəti İdarəsinin müfəttişləri tərəfindən ötən il ümumi gücü 29555,0 kilovolt və 768361 kilovolt-amper olmaqla 1042 obyektə istismara buraxılış aktı verilib.