Bakı, 1 oktyabr (AZƏRTAC). Oktyabrın 1-də Azərbaycan Respublikasının Hərbi Prokurorluğunda 1 oktyabr - Prokurorluq işçilərinin peşə bayramı günü və milli prokurorluğun yaradılmasının 95-ci ildönümünə həsr olunmuş təntənəli mərasim keçirilmişdir.

Hərbi Prokurorluğun mətbuat xidmətindən AZƏRTAC-a bildirmişlər ki, mərasim iştirakçıları əvvəlcə Fəxri xiyabanda xalqımızın ümummilli lideri Heydər Əliyevin məzarını və Azərbaycanın ərazi bütövlüyü uğrunda canlarından keçmiş həmvətənlərimizin uyuduqları Şəhidlər xiyabanını ziyarət etmişlər.

Peşə bayramı günü münasibətilə prokurorluq əməkdaşlarını təbrik edən hərbi prokuror, ədliyyə general-leytenantı Xanlar Vəliyev qeyd etmişdir ki, müstəqil Azərbaycan dövlətinin memarı və qurucusu, ulu öndər Heydər Əliyevin tarixi reallığı bərpa edən və prokurorluğun cəmiyyətdə rolu və yeri məsələsinə dövlət səviyyəsində münasibət bildirən 1998-ci il 17 iyul tarixli Sərəncamı ilə hər il oktyabr ayının 1-i Prokurorluq işçilərinin peşə bayramı kimi qeyd edilməsi bütün prokurorluq əməkdaşları üçün müstəsna əhəmiyyət kəsb edən bir hadisədir.

Prokurorluğun hər bir əməkdaşında qürur hissi doğuran haldır ki, bu orqanın sivil və demokratik məzmunda bir dövlət qurumu kimi formalaşması ölkəmizdə həyata keçirilən məhkəmə-hüquq islahatlarının memarı Heydər Əliyevin dövlətçilik siyasəti, onun gündəlik qayğısı və dəstəyi sahəsində mümkün olmuşdur.

X.Vəliyev vurğulamışdır ki, dövlət tərəfindən prokurorluq orqanlarına daim hərtərəfli diqqət və qayğı göstərilir, bu qurumların fəaliyyətinin daha da təkmilləşdirilməsi, əməkdaşların maddi-sosial vəziyyətinin yaxşılaşdırılması istiqamətində müvafiq tədbirlər görülür. Prokurorluq orqanlarının müasir dövrün yüksək tələblərinə cavab verən dövlət təsisatı səviyyəsinə uyğun təkmilləşdirilməsində “Azərbaycan Respublikası Prokurorluğunun fəaliyyətinin müasirləşdirilməsinə dair 2009-2011-ci illər üçün Dövlət Proqramı” xüsusi əhəmiyyətə malikdir. Azərbaycan Prokurorluğunun tarixində yeni təkmilləşmə və inkişafın, hərtərəfli müasirləşmə dövrünün əsasını qoyan bu proqram ölkənin hüquq sistemində prokurorluğun rolunun artırılması, digər hüquq mühafizə orqanları ilə qarşılıqlı, əlaqəli fəaliyyətin təkmilləşdirilməsi, müasir elmi-texniki nailiyyətlərdən geniş istifadə olunmaqla mərkəzləşdirilmiş informasiya-kommunikasiya sisteminin yaradılması, bütün istiqamətlər üzrə işin səmərəliliyinin və əməkdaşların peşəkarlığının yüksəldilməsi, habelə yeni nəsil prokurorluq işçilərinin formalaşdırılması, onların sosial müdafiəsinin gücləndirilməsi istiqamətində konkret tədbirlərin həyata keçirilməsi ilə nəticələnmişdir.

Dövlət proqramında nəzərdə tutulmuş tədbirlərin icrası istiqamətində mühüm işlər görülmüşdür. Dövlət proqramına müvafiq olaraq Azərbaycanın hərbi prokurorluq orqanlarının strukturunun təkmilləşdirilməsi və fəaliyyətinin səmərəliliyinin artırılması məqsədilə Respublika Hərbi Prokurorluğunda kadrlar şöbəsi, ağır cinayətlərə dair işlər üzrə istintaq idarəsinin tərkibində xüsusi istintaq və maddi-texniki təminat şöbələri yaradılmış, dövlət başçısının müvafiq Sərəncamı ilə Zaqatala Hərbi Prokurorluğu yaradılaraq fəaliyyətə başlamışdır.

Bildirilmişdir ki, digər hüquq mühafizə orqanları kimi, hərbi prokurorluğun kollektivi də ölkəmizdə ictimai-siyasi sabitliyin qorunması, cinayətkarlığa qarşı mübarizənin, Silahlı Qüvvələrdə nizam-intizamın gücləndirilməsi, dövlət müstəqilliyimizin, insan hüquq və azadlıqlarının etibarlı müdafiəsi istiqamətində uğurlu nəticələr əldə etmişdir və bundan sonra da bütün mümkün tədbirlər görüləcəkdir.

Dövlət səviyyəsində göstərilən yüksək qayğının nəticəsi olaraq son illər ərzində Azərbaycan Respublikası Hərbi Prokurorluğunun maddi-texniki bazasının müasir standartlar səviyyəsində daha da möhkəmləndirilməsi sahəsində böyük həcmli işlər görülməklə, bir neçə yeni inzibati binanın tikintisi və əsaslı təmirinin həyata keçirilməsi təmin olunmuşdur. Ulu öndərimiz Heydər Əliyevin 90 illik yubileyi ərəfəsində Respublika Hərbi Prokurorluğunun yeni doqquzmərtəbəli və Prokurorluq işçilərinin peşə bayramı günü ərəfəsində Zaqatala Hərbi Prokurorluğu üçün yeni inzibati binalar tikilib istifadəyə verilmişdir.

Prokurorluğa dövlət səviyyəsində göstərilən qayğıya görə minnətdarlığını bildirən X.Vəliyev əmin etmişdir ki, Respublika Hərbi Prokurorluğu öz işini göstərilən etimad səviyyəsində qurmaq üçün bütün zəruri tədbirlərin görülməsini təmin edəcək, dövlətçiliyimizin maraqlarının müdafiəsi işində öz səylərini əsirgəməyəcəkdir.

Sonda hərbi prokuror X.Vəliyev xidmətdə fərqlənən bir qrup əməkdaşa mükafatlar, qiymətli hədiyyələr və hərbi rütbələr təqdim etmişdir.