Naxçıvan, 4 dekabr (AZƏRTAC). Naxçıvan Muxtar Respublikası (MR) Dövlət Gömrük Komitəsində “Heydər Əliyev lektoriyası”nın XV məşğələsi keçirilmişdir. Lektoriyanı giriş sözü ilə komitənin sədri, gömrük xidməti general-leytenantı Asəf Məmmədov açmış, ulu öndər Heydər Əliyevin əziz xatirəsi bir dəqiqəlik sükutla yad edilmişdir.

AZƏRTAC xəbər verir ki, Yeni Azərbaycan Partiyası Naxçıvan MR təşkilatının icra katibi, Naxçıvan MR Ali Məclisinin deputatı Anar İbrahimov “Ulu öndər Heydər Əliyev: dünənin, bu günün və gələcəyin lideri” mövzusunda məruzə ilə çıxış etmişdir. Bildirilmişdir ki, ümummilli lider Heydər Əliyev Azərbaycan xalqının taleyinə müxtəlif dövrlərdə müstəsna təsir göstərmiş dahi şəxsiyyətlərin fövqündə dayanan görkəmli dövlət xadimidir. Azərbaycan xalqının ümummilli lideri Heydər Əliyev müasir tariximizə qüdrətli xilaskar, böyük qurucu kimi daxil olmuşdur. Azərbaycanın müasir tarixi görkəmli dövlət xadimi Heydər Əliyevin adı, onun xilaskarlıq və quruculuq missiyası ilə bilavasitə bağlıdır.

Vurğulanmışdır ki, ümummilli lider Heydər Əliyevin ölkə həyatına gətirdiyi əzəmətli inkişaf meyilləri dahi rəhbərin xalqımızın tarixində həlledici rol oynadığını sübuta yetirən ən tutarlı faktlardandır. Bu fakt həm də ona görə xüsusi əhəmiyyətə malikdir ki, görkəmli dövlət xadimi Heydər Əliyev sözügedən sosioloji qanunauyğunluğu iki dəfə sübuta yetirməli olmuşdur. Azərbaycanın iki böhranlı mərhələsində xalqın və ölkənin xilası və inkişafının əsasının qoyulması ulu öndər Heydər Əliyevin bilavasitə möhtəşəm tarixi xidməti kimi qəbul edilir və dəyərləndirilir. Bu mənada ümummilli lider Heydər Əliyevin timsalında tarixdə şəxsiyyətin rolunu əks etdirən nəzəriyyə özünün təsdiqini tapmışdır.

Xalqımız müstəqil dövlət quruculuğu sahəsində qazanılan böyük uğurlara görə Heydər Əliyevə minnətdardır.

Adı Azərbaycan tarixinə dahi xilaskar və böyük qurucu kimi həkk edilən Ulu Öndərin zəngin irsi, ideyaları və tövsiyələri müasir cəmiyyətimizin inkişafının nəinki ideya mənbəyi, habelə möhtəşəm səfərbəredici qüvvəsidir. Ümummilli Liderin təlatümlərdən çıxararaq qurub-yaratdığı Azərbaycan Prezident İlham Əliyevin rəhbərliyi ilə bütün dünyaya möhtəşəm yüksəliş dinamikası nümayiş etdirir. Xilaskarlıq missiyasının yaratdığı quruculuq ab-havası yeni, müasir Azərbaycanın real siyasi və iqtisadi gerçəklərində təzahür edir.

Çıxışlardan sonra lektoriya iştirakçıları Heydər Əliyevin həyat və siyasi fəaliyyətinə həsr olunmuş “Azərbaycan qədər əbədi” adlı filmə baxmışlar.