Ədəbiyyat Muzeyində Milli Qurtuluş Gününə həsr olunan tədbir keçirilib
Bakı, 13 iyun, AZƏRTAC
Nizami Gəncəvi adına Milli Azərbaycan Ədəbiyyatı Muzeyində Milli Qurtuluş Gününə həsr olunan “Sən tarix yaradan” adlı ədəbi-musiqili tədbir keçirilib.
AZƏRTAC xəbər verir ki, tədbir muzeyin Həmkarlar İttifaqı Komitəsinin təşkilatçılığı, “5 nömrəli Uşaq-Gənclər İnkişaf Mərkəzi” publik hüquqi şəxsin müəllim və şagirdlərinin iştirakı ilə baş tutub.
Tədbiri açan Ədəbiyyat Muzeyinin direktoru akademik Rafael Hüseynov Milli Qurtuluş Gününü Azərbaycanın tarixində, müasir həyatında ən əlamətdar bayramlardan biri kimi səciyyələndirib.
Azərbaycanın XX əsrin başlanğıcında öz istiqlalını qazandığını, dövlət müstəqilliyini əldə etdiyini söyləyən akademik Rafael Hüseynov 1918-ci il mayın 28-də ucaldılan istiqlal bayrağımızın 1920-ci ilin aprelində bolşevik işğalı nəticəsində endirildiyini bildirib.
O, cümhuriyyətimizin qurucularının gələcəyə baxaraq söylədiyi və həqiqəti əks etdirən “Bir kərə yüksələn bayraq bir daha enməz” ifadəsini xatırladaraq, ömür boyu istiqlal eşqini ürəyində daşıyan Azərbaycan xalqının 1991-ci ilin oktyabrında uzun illər həsrətində olduğu müstəqilliyini qanı bahasına yenidən bərpa etdiyini deyib. Qeyd edib ki, XX əsrin 90-cı illərinin əvvəllərində xalqımız müstəqilliyini bərpa etsə də, onu itirmək təhlükəsi ilə üz-üzə qalmışdı. Belə bir vaxtda qədirbilən xalqımız Azərbaycanı bu çətin vəziyyətdən çıxara biləcək yeganə şəxsiyyət olan Ümummilli Lider Heydər Əliyevi təkidlə yenidən ölkəmizin siyasi rəhbərliyinə dəvət etdi. Ulu Öndər həmin dövrdə, ilk növbədə, Azərbaycanı parçalanmaq təhlükəsindən qorudu, vətənimizin davamlı, hərtərəfli inkişafını təmin etdi.
“Azərbaycanın böyük xoşbəxtliyidir ki, o dövrdə tarixin çağdaş gerçəkliyinin çox sirlərinə bələd olan Heydər Əliyev kimi dahi şəxsiyyəti var. O, çətin, sınaqlı günlər içərisində Azərbaycan istiqlalını, dövlət müstəqilliyimizi qoruya bildi. Azərbaycan təqvimində 15 iyun tarixi Milli Qurtuluş Günü olmaqla yanaşı, həm də müstəqillik, istiqlal, respublika və milli bayramdır”, - deyə akademik Rafael Hüseynov əlavə edib.
Milli Qurtuluş Gününün tarixi əhəmiyyətindən danışan alim ölkəmizin uzunmüddətli davamlı və sürətli inkişafının məhz bu möhtəşəm tarixdən başlandığını bildirib. Vurğulayıb ki, Ümummilli Lider Heydər Əliyevin siyasi təfəkkürü, uzaqgörənliyi, çətin vəziyyətlər içərisində ən düzgün yolu tapmaq qabiliyyəti sayəsində Azərbaycan çətin və taleyüklü sınaqlardan uğurla çıxıb. Ulu Öndərin müdrikcəsinə söylədiyi “Azərbaycan dünyaya günəş kimi doğacaq” fikri bu gün artıq reallaşıb.
Akademik Rafael Hüseynov Ulu Öndərin siyasi kursunun layiqli davamçısı Prezident İlham Əliyevin dövlətimizin müstəqilliyini daha da möhkəmləndirməsindən, eləcə də 44 günlük Vətən müharibəsində ərazi bütövlüyümüzün və suverenliyimizin təmin olunmasından, şanlı Qələbəmizdən ətraflı bəhs edib.
O, tədbirin keçirildiyi məkanın Azərbaycan istiqlalının, Azərbaycan dövlət müstəqilliyinin başlıca ünvanlarından biri olduğunu söyləyərək, 1918-ci ilin sentyabrından etibarən AXC Nazirlər Kabinetinin “Metropol” adlanan indiki Milli Azərbaycan Ədəbiyyatı Muzeyində yerləşdiyini diqqətə çatdırıb. Bildirib ki, burada həm yaşayan, həm də fəaliyyət göstərən hökumət üzvləri, millətin öndə gedən insanları Azərbaycanın gələcəyi ilə bağlı mühüm tədbirlər görüblər. Nazirlər Kabinetinin iclasları bu muzeydə keçirilib, ölkə həyatını nizamlayan ən vacib qərarlar məhz bu tarixi binada qəbul olunub.
2025-ci ilin ölkəmizdə “Konstitusiya və Suverenlik İli” elan edildiyini vurğulayan muzeyin direktoru bildirib ki, həmin ilin fəlsəfəsi ilə bugünkü günün fəlsəfəsi üst-üstə düşür. “Konstitusiya və Suverenlik İli”ndə Milli Qurtuluş Gününü sonsuz qürur və iftixar hissi ilə qeyd edirik. Hazırda Azərbaycan dövləti yaratdığı yeni reallıqlar şəraitində müstəqil siyasətini daha cəsarətlə, prinsipiallıqla davam etdirir, Konstitusiyanın tələblərinə və öz suveren hüquqlarına əsaslanaraq, qarşıda duran strateji hədəflərə doğru inamla irəliləyir.
Sonra tədbir iştirakçıları Milli Qurtuluş Gününü əks etdirən videoçarxı izləyib, Ulu Öndər Heydər Əliyevə həsr edilən sərgi ilə tanış olublar.
Tədbirin bədii hissəsi 5 nömrəli Uşaq-Gənclər İnkişaf Mərkəzinin şagirdlərinin və muzey əməkdaşlarının müxtəlif məktəbləri təmsil edən övladlarının çıxışları ilə davam edib. Məktəblilərin ifasında Xalq şairi Rəsul Rzanın “Mən torpağam”, şair Ənvər Əlibəylinin “Möhtəşəm bir yolun yolçusuyuq biz”, akademik Rafael Hüseynovun “Sən tarixi yaradan”, “Zirvələrdən baxan Öndər”, “Davamçın var” kimi Vətənə, xalqımıza və Ulu Öndər Heydər Əliyevə həsr olunmuş şeirlər səsləndirilib, bədii kompozisiyalar nümayiş etdirilib.
Tədbirdə iştirakçılara muzey rəhbərliyi adından fəxri fərmanlar təqdim olunub.
Sonda 5 nömrəli Uşaq-Gənclər İnkişaf Mərkəzinin direktoru Elza Orucova çıxış edərək tədbirin təşkilinə görə muzey rəhbərliyinə təşəkkürünü bildirib.
Qeyd edək ki, ədəbi-musiqili tədbir “Ümummilli Lider Heydər Əliyev müstəqil Azərbaycan Konstitusiyasının müəllifidir” mövzusunda silsilə tədbirlərin davamı olaraq təşkil edilib.
Bölmənin digər xəbərləri
