ƏDLİYYƏ NAZİRLİYİNDƏ AVROPA ŞURASININ HƏMMƏRUZƏÇİLƏRİ İLƏ GÖRÜŞ OLMUŞDUR
AZƏRTAC xəbər verir ki, ölkəmizdə səfərdə olan Avropa Şurası Monitorinq Komitəsinin Azərbaycan üzrə həmməruzəçiləri Andres Herkel və Yevgeniya Jivkova mayın 19-da ədliyyə naziri, Məhkəmə-Hüquq Şurasının sədri Fikrət Məmmədov ilə görüşmüşlər.
Ədliyyə Nazirliyinin mətbuat xidmətindən bildirmişlər ki, Azərbaycanın Avropa Şurası ilə əməkdaşlığa xüsusi önəm verdiyini diqqətə çatdıran nazir, ədliyyə sisteminin inkişaf etdirilməsi, o cümlədən penitensiar xidmətin fəaliyyətinin qabaqcıl standartlara uyğun təkmilləşdirilməsi - məhbuslara göstərilən tibbi xidmətin keyfiyyətinin yüksəldilməsi, saxlanma şəraitinin yaxşılaşdırılması, bu sahəyə ictimai nəzarətin gücləndirilməsi, habelə yeni müasir cəzaçəkmə müəssisələrinin və istintaq təcridxanasının inşası barədə ətraflı məlumat vermişdir.
Cəzaçəkmə müəssisələrinə baş çəkilməsi üçün hər cür şərait yaradıldığına görə təşəkkürlərini bildirən qonaqlar, ölkəmizdə aparılan islahatlardan xəbərdar olduqlarını, Avropa Şurası ilə qarşılıqlı fəaliyyətin genişləndirilməsinin əhəmiyyətini qeyd etmişlər.
Görüşdə insan haqlarının, o cümlədən məhkumların hüquqlarının qorunması, onlarla davranışa, vicdan azadlığına dair, habelə qeydiyyat məsələləri ilə bağlı faydalı fikir mübadiləsi aparılmış, mövcud qanunvericiliyin daha da təkmilləşdirilməsi və digər maraq doğuran suallara aydınlıq gətirilmişdir.
######
Bölmənin digər xəbərləri
