Bakı, 29 noyabr, AZƏRTAC

Prezident İlham Əliyevin strateji yanașması və siyasi iradəsi nəticəsində Azərbaycanda 2018-ci ildən sosial müdafiə sisteminin təșkilində reallaşdırılmış struktur və qabaqlayıcı islahatlar əhalinin sosial-iqtisadi rifahını dünya təsərrüfat sistemdə formalaşan iqtisadi risklərə qarşı qoruyub. Məhz bu proses özünü son 6 ilin sosial indikatorlarında da özünü göstərib. Bu illər ərzində 4 sosial islahat zərfi qəbul edilib, bu zərflərin ümumi büdcə tutumu 7 milyard manat olmaqla 4 milyon vətəndaşı əhatə edir. Bu isə əhalinin 40 faizi deməkdir. Məhz bu sosial paketlər əhalinin sosial-iqtisadi rifahını iqtisadi risklərdən xeyli qoruyub.

Bu sözləri AZƏRTAC-a açıqlamasında iqtisadçı-ekspert, Əmək və Əhalinin Sosial Müdafiəsi Nazirliyi yanında İctimai Şuranın üzvü Aslan Əzimzadə bildirib.

İctimai Şura üzvünün sözlərinə görə, əhalinin real gəlirləri ilə iqtisadi inkişaf arasındakı proporsionallığın qorunması bu gün ölkənin sosial siyasətinin magistral istiqamətlərindən biri kimi səciyyələnməkdədir.

“Əməkhaqqı üzrə təhlillər onu deməyə imkan verir ki, ölkə üzrə əməkhaqqı fondunda 3 dəfəyə yaxın artım müşahidə olunmaqdadır. Paralel olaraq, əməkhaqqı fondunun Ümumi Daxili Məhsula nisbətidir ki, bu göstərici üzrə də son 6 il ərzində 2 dəfəyə yaxın artım qeydə alınıb. Sözügedən göstərici ölkə iqtisadiyyatında yaranan əlavə dəyərin əhalinin sosial rifahına təsirini müəyyən etməkdədir. Məhz bu kontekstdə 2018-ci ildən etibarən minimum pensiyalarda, orta aylıq əməkhaqqında, median əməkhaqqında faizlər ilə deyil dəfələrlə artım nəzərə çarpır. Təbii ki, öz növbəsində sosial siyasətin effektiv reallaşdırılması, əhalinin alıcılıq qabiliyyətinin saxlanılmasını və daxili bazarda istehlakın stimullaşdırılması kimi multiplikativ effektləri özündə ehtiva etməkdədir”, - deyə Aslan Əzimzadə vurğulayıb.

İqtisadçı-ekspert onu da qeyd edib ki, bütün sadalan faktorlar bir daha ölkənin sosial siyasətinin mərkəzində insan amilinin dayandığını deməyə əsas verir. Bu gün ölkəmizdə sosial siyasətin önəmli istiqamətlərindən biri də müharibə iştirakçılarının aktiv məşğulluq tədbirlərinə cəlb edilməsi və əmək bazarına inteqrasiyasının təminatıdır: “Belə ki, postmüharibə dövründə reallaşdırılan sosial dəstək tədbirləri 130 min şəxsi əhatə edərək 363 min xidməti özündə ehtiva edib. Bu tədbirlər zamanı mənzil və avtomobil təminat proqramı 19,9 min nəfəri əhatə edib. Eyni zamanda, bu dəstək paketi çərçivəsində müavinət və təqaüdlər orta hesabla 2 dəfəyədək artırılıb. Belə olan halda sözügedən vətəndaşların əməkhaqqından əldə etdikləri maliyyə resursları indiki müavinətlərdən dəfələrlə yüksək olacaq ki, bu da əhalinin həssas kateqoriyalarının sosial rifahının daha da artırılması ilə nəticələnəcək. Məhz bu göstəricilərdə dayanıqlı və artan trendlərin müşahidə olması ölkə rəhbərliyinin şəhid ailələri və müharibə iştirakçılarına göstərdiyi qayğının önəmli indikatorlarındadır”.

İqtisadçı-ekspertin vurğuladığı digər önəmli məsələ isə büdcə xərcləri çərçivəsində sosial xərclərin tutumudur: “Prezident İlham Əliyevin siyasi iradəsinə əsasən sosial müdafiə sistemində rəqəmsallaşma və proaktiv xidmətlər vasitəsilə şəffaf idarəetmə siyasətinin formalaşması kontekstində əldə olunan resurslar dövlət büdcəsinin sosial xərclər seqmentinin artırılmasına önəmli təkan verib. Əsas makroiqtisadi indikatorlardakı artım Azərbaycanda effektiv və mütərəqqi sosial siyasətin qabaqlayıcı olmasını şərtləndirməkdədir”.