Qax, 24 sentyabr (AZƏRTAC). Qax rayonunda Azərbaycan Respublikasının dövlət müstəqilliyinin bərpasının 20-ci ildönümünə həsr olunmuş silsilə tədbirlər davam edir.

AZƏRTAC xəbər verir ki, sentyabrın 24-də “Bank Respublika” ASC-nin Qax rayonunda yeni filialının açılış mərasimi keçirilmişdir.

Mərasimdə çıxış edən bankın filiallarla iş departamentinin direktoru Emil Rüstəmov dövlətimizin başçısı tərəfindən regionların inkişafına göstərilən diqqət və qayğının nəticəsində ölkənin müxtəlif şəhərlərində yeni bank filiallarının açılmasının əhaliyə nümunəvi xidmətlər göstərilməsi üçün hərtərəfli şərait yaratdığını bildirmişdir. İndi sahibkarlar və iş adamları bütün maliyyə əməliyyatlarını bu banklar vasitəsilə asanlıqla həyata keçirirlər.

Diqqətə çatdırılmışdır ki, “Bank Respublika” Azərbaycanda 19 ildir fəaliyyət göstərir və bu illər ərzində ölkənin aparıcı banklarından birinə çevrilmişdir.

Mərasimdə rayon icra hakimiyyətinin başçısı Musa Şəkiliyev çıxış edərək müstəqilliyimizin və dövlətçiliyimizin memarı və qurucusu, ümummilli lider Heydər Əliyevin tarixi xidmətlərini xatırlatmış, bu gün Prezident İlham Əliyevin məqsədyönlü siyasəti sayəsində müstəqil Azərbaycan Respublikasının dünyanın qabaqcıl ölkələri sırasında olduğunu xüsusi vurğulamışdır.

Rəmzi qırmızı lent kəsildikdən sonra filiala baxış olmuşdur. Filialda əməkdaşlar və müştərilər üçün hər cür şərait yaradılmışdır. Yüksək səviyyəli pul köçürmələri, kreditlərin alınması, hesablaşma-kassa xidmətləri və müxtəlif maliyyə əməliyyatlarını aparmaq üçün bank filialında geniş imkanlar vardır.

Dövlət müstəqilliyimizin bərpasının 20-ci ildönümü ilə əlaqədar xüsusi tədbirlər planına uyğun bu günlərdə rayonda bir sıra tədbirlər reallaşdırılmışdır. Heydər Əliyev Muzeyində “Heydər Əliyev müstəqilliyimizin qarantıdır” mövzusunda “dəyirmi masa”, gənclər və idman idarəsində “Gənclər müstəqil Azərbaycanın gələcəyidir” mövzusunda rayon gənclərinin toplantısı, mərkəzləşdirilmiş kitabxana sistemində “Azadlığı istəmirəm zərrə-zərrə” mövzusunda ədəbi-bədii gecə, mədəniyyət evində məktəblilər arasında “Azərbaycan-dünyam mənim” mövzusunda bədii qiraət müsabiqəsi keçirilmiş, rəsm qalereyasında gənc rəssamların “Bura Vətəndir” mövzusunda rəsm sərgisi açılmışdır. Bundan əlavə, məktəblilər arasında “Azərbaycanın müstəqillik tarixi” mövzusunda bilik yarışı keçirilmiş, Qax şəhərində və kəndlərdə idmanın futbol, güləş, stolüstü tennis və digər növləri üzrə turnirlər təşkil edilmişdir.

Tədbirlər planı çərçivəsində sentyabrın 24-də rayon icra hakimiyyətində azsaylı xalqların nümayəndələrinin iştirakı ilə “Müstəqil Azərbaycanda tolerantlıq” mövzusunda görüş, həmçinin ümumtəhsil məktəblərinin şagirdləri arasında “Müstəqil Azərbaycan məktəblilərin gözü ilə” mövzusunda inşa yazı müsabiqəsi keçirilmişdir.

Dövlət müstəqilliyinin bərpasının 20-ci ildönümü ilə bağlı silsilə tədbirlərə sentyabrın 25-də yekun vurulacaqdır. Həmin gün şəhərin mərkəzi meydanında bayram konserti və atəşfəşanlıq olacaqdır.

######