Elmin İnkişafı Fondu ilə Yaponiyanın tanınmış şirkəti arasında Anlaşma Memorandumu imzalanmışdır
Bakı, 27 may (AZƏRTAC). Azərbaycan Respublikasının Prezidenti yanında Elmin İnkişafı Fondunun (EİF) icraçı direksiyasında 28 May-Respublika Gününə həsr olunmuş tədbirdə bu qurum ilə Yaponiyanın elmi-analitik cihaz, avadanlıq və qurğuları istehsal edən tanınmış “Tokyo Boeki Technology Ltd” şirkəti arasında Anlaşma Memorandumu imzalanmışdır.
EİF-dən AZƏRTAC-a bildirmişlər ki, sənədi fondun icraçı direktoru Elçin Babayev və “Tokyo Boeki Technology Ltd” şirkətinin prezidenti Kazuei Uçida imzalamışlar.
Tədbirdə Yaponiyanın Azərbaycandakı səfirliyinin müşaviri, missiya rəhbərinin müavini xanım Hideko Ono iki ölkə arasında əməkdaşlığının bütün sahələrdə dinamik inkişaf etdiyini vurğulamışdır.
Memorandum Azərbaycan ilə Yaponiya arasında elm və texnologiyaların transferi sahəsində əməkdaşlığın inkişafına töhfə vermək məqsədi daşıyır və bu münasibətin iki ölkə arasında dostluq əlaqələrini möhkəmləndirəcəyini nəzərdə tutur.
Sənədə əsasən, tərəflər bərabərlik və qarşılıqlı mənfəət prinsipləri əsasında, Azərbaycanın və Yaponiyanın fəaliyyətdə olan qanunvericiliyinə uyğun olaraq əməkdaşlığı həvəsləndirəcəklər.
“Tokio Boeki Technology Ltd” şirkəti fondun qrant layihələri üçün mürəkkəb elmi-analitik cihazların seçimi, tətbiqi və istifadəsi üzrə məsləhət işlərini həyata keçirmək, bu layihələrin zəruri elmi-analitik cihazları vasitəsilə təchizat səviyyəsinin yüksəldilməsi istiqamətində tədbirlərin görülməsi, xüsusi halda, müvafiq Yaponiya istehsalçılarından tələb olunan elmi-analitik cihazların fondun qrant layihələrinə çatdırılması üçün EİF ilə müqavilələrin bağlanmasını təmin edəcəkdir.
Bu qurum, həmçinin fondun maliyyələşdirdiyi tədqiqat qrantları üçün nəzərdə tutulmuş elmi-analitik cihazlar EİF tərəfindən alındıqda uyğun formallıqların hazırlanmasına, fondun qrant layihələrinin elmi-analitik cihazlarla təchizatının təmin edilməsi üçün Yaponiya maliyyə vasitəçi təşkilatlarının vəsaitlərinin cəlb edilməsinə kömək göstərəcəkdir.
“Tokio Boeki Technology Ltd” şirkəti elmi iclasların, konfransların, simpoziumların, görüşlərin, elm festivallarının və sərgilərin təşkili ilə əlaqədar tərəflər arasında müştərək layihələr təklif etmək və onların reallaşdırılmasında iştirak, Azərbaycanın elm sahəsində uğurlarının Yaponiyanın dövlət təşkilatları və özəl müəssisələri arasında təşviqini aparmaq kimi öhdəlikləri də öz üzərinə götürür.
Razılığa əsasən, tərəflər birgə layihələr və qrant müsabiqələri həyata keçirə bilərlər.
İyirmi iki şirkəti özündə birləşdirən beynəlxalq “Tokyo Boeki Group” Holdinqin üzvü olan “Tokyo Boeki Technology Ltd” şirkəti “JEOL”, “Nikon”, “Rigaku”, “Ulvac”, “Katsuragawa Electric”, “Yamato Scientific” kimi tanınmış markalarla işləyir.
“Tokyo Boeki Group” 1947-ci ildə “Тokyo Boeki Shokai” adı ilə altında yaradılmışdır və yüksək keyfiyyətli sənaye (energetika, maşınqayırma, metal istehsalı) və mürəkkəb elmi-analitik cihazların istehsalı və satışı ilə tanınır.
Artıq bu şirkətin iki bahalı və ultramodern elektron mikroskopu qrant layihələri çərçivəsində Elmin İnkişafı Fondu tərəfindən alınaraq AMEA-nın Geologiya İnstitutunda (skanedici elektron mikroskop) və Azərbaycan Tibb Universitetində (transmissiya (nüfuzedici) elektron mikroskopu) quraşdırılmış, tədqiqatçıların istifadəsinə verilmişdir. Həmçinin işçi heyət qrant hesabına təlimlər də keçmişdir.
Daha iki cihazın alınması ilə bağlı qurumlar arasında müvafiq müqavilələr imzalanmışdır. Həmin cihazların yaxın günlərdə AMEA-nın Fizika İnstitutuna (transmissiya (nüfuzedici) elektron mikroskopu) və Geologiya İnstitutuna (karbon ilə tozlandıran cihaz və aksesuarlar dəsti) gətiriləcəyi gözlənilir.
Elmin İnkişafı Fondu və “Tokyo Boeki Techology Ltd” şirkəti Azərbaycanda Elm Festivalının keçirilməsi, həmçinin elmi-analitik cihazların sərgisinin təşkili barədə də ilkin razılığa gəlmişlər.
Bölmənin digər xəbərləri
