Elmin İnkişafı Fondu qrant layihələrinin rəhbərləri ilə görüş keçirmişdir
Bakı, 1 fevral (AZƏRTAC). Azərbaycan Respublikasının Prezidenti yanında Elmin İnkişafı Fondu (EİF) fevralın 1-də “Hilton Baku” otelində 2012-ci il üçün ikinci qrant müsabiqəsinin qalib layihə rəhbərləri və qurumun əvvəlki müsabiqələrinin uğurla yerinə yetirilmiş layihələrinin rəhbərləri ilə görüş keçirmişdir.
AZƏRTAC xəbər verir ki, tədbirdə fondun icraçı direktoru Elçin Babayev rəhbərlik etdiyi qurumun 2012-ci ildəki fəaliyyəti haqqında qısa hesabatla çıxış etmişdir.
Bildirilmişdir ki, Azərbaycan Respublikası Prezidentinin Sərəncamı ilə yaradılmış fond 2010-cu ilin iyunundan bu günədək elmi-tədqiqat proqramlarının, layihələrinin və digər elmi tədbirlərin maliyyələşdirilməsi məqsədi ilə qrantların verilməsi üzrə bir sıra müsabiqələr keçirmiş, 150-dən çox layihə maliyyələşdirilmişdir. Sonuncu müsabiqə üzrə elmin ən müxtəlif sahələrini əhatə edən 39 qalib layihə müəyyənləşdirilmişdir.
Qrant layihələri arasında pilot layihələri xüsusi yer tutur. Bu layihələr əhəmiyyətli və qısa zamanda dönüş yarada biləcək elmi-texniki nəticələrə nail olunması üçün elmin müəyyən sahəsinin inkişafına böyük həcmli qrantın ayrılması, elmi-tədqiqat qurumlarının müasir cihaz, avadanlıq və qurğularla təchiz edilməsi, bu cihazlarda işləyə bilən kadrların xaricdə təcrübə keçmək yolu ilə hazırlığı və digər məsələlərin həlli məqsədi ilə həyata keçirilir. 2012-ci ilin ikinci müsabiqəsi üzrə dörd pilot layihə qalib olmuşdur. Ümumi həcmi 5.600000 manat olan həmin layihələr fizika, genetika və kimya elmlərini əhatə edir.
E.Babayev diqqətə çatdırmışdır ki, cari müsabiqənin nəticələri üzrə ümumi həcmi 1. 585000 manat olan və elmin müxtəlif sahələrini əhatə edən 27 fundamental və tətbiqi xarakterli elmi-tədqiqat layihəsi müəyyənləşdiriləcəkdir. Bundan əlavə, EİF ölkədə “Ətraf mühit dəyişməsi və bitki müxtəlifliyinin qorunması” mövzusunda beynəlxalq elmi konfransın təşkilini, xaricdə üç qısamüddətli elmi təcrübəkeçməni, elmi tədqiqatların maddi-texniki təminatını nəzərdə tutan üç layihəni və bir elmi nəşri də dəstəkləyəcəkdir.
Qeyd olunmuşdur ki, EİF bu yaxınlarda iki yeni müsabiqə elan etmişdir. “Mobillik qrantı” müsabiqəsi alimlərimizin elmi fəaliyyətini stimullaşdırmaq, onlara xaricdə elmi tədbirlərdə və qısamüddətli təcrübəkeçmədə iştirak, Azərbaycanda alınmış elmi nəticələrin tanıdılması, təcrübə mübadiləsi və yeni əlaqələrin qurulması imkanı yaratmaq məqsədi ilə keçirilir. Bu müsabiqənin ildə təxminən üç dəfə keçirilməsi nəzərdə tutulmuşdur.
Digər müsabiqə 2012-ci il sentyabrın 28-də Minskdə EİF ilə Belarus Milli Elmlər Akademiyası və Belarus Respublikası Fundamental Tədqiqatlar Fondu arasında imzalanmış əməkdaşlıq haqqında beynəlxalq sazişə əsasən, Azərbaycan və Belarus alimlərindən ibarət müvəqqəti yaradıcı kollektivlər tərəfindən birgə yerinə yetirilməsi planlaşdırılan və hər iki tərəf üçün aktual olan elmi istiqamətlər üzrə elmi-tədqiqat layihələrini qrantlar şəklində dəstəkləməyi nəzərdə tutan birinci Azərbaycan-Belarus birgə beynəlxalq qrant müsabiqəsidir. İki ölkə arasında dostluq və əməkdaşlığın daha da möhkəmləndirilməsi istiqamətində uğurlu addımlardan biri kimi dəyərləndirilən, ötən il dekabrın 28-də elan edilmiş bu müsabiqə EİF-in digər ölkələrdəki analoji qurumlarla müntəzəm əlaqə saxlamasının və təcrübə mübadiləsi aparmasının parlaq nümunəsidir.
Fondun icraçı direktoru vurğulamışdır ki, EİF ildən-ilə beynəlxalq əlaqələrini genişləndirir və birgə qrant müsabiqələrinin təşkili üzrə əməkdaşlıq sahəsində konkret planlar həyata keçirilir. Bu baxımdan Avropa Komissiyasının yeddinci Çərçivə Proqramı ilə əməkdaşlıq uğurlu olmuşdur.
Tədbirdə 2 fevral - Gənclər Gününə töhfə olaraq, EİF gəncalim və mütəxəssislərin növbəti, ikinci qrant müsabiqəsini elan etmişdir. Bu müsabiqə üzrə layihələrin ümumi maliyyələşdirmə həcmi 500.000 manat nəzərdə tutulmuşdur.
Azərbaycan Milli Elmlər Akademiyasının vitse-prezidenti, akademik Nailə Vəlixanlı, qalib layihə rəhbərləri çıxış edərək elmimizin inkişafında və dünya elminə inteqrasiyasında EİF-in rolunu xüsusilə vurğulamış, fondun fəaliyyətini yüksək qiymətləndirmişlər.
Görüşdə qalib layihə rəhbərlərinə fondun iş prinsipi, qrant layihələrinin yerinə yetirilməsinin elmi, maliyyə və hüquqi aspektləri haqqında məlumat verilmiş, suallar cavablandırılmışdır.
Həmçinin əvvəlki müsabiqələr üzrə uğurla yerinə yetirilmiş bir sıra qrant layihələrinin rəhbərlərinə sertifikatlar təqdim edilmiş, fondun elmi nəşrlərin dəstəklənməsi xarakterli qrant layihələri çərçivəsində çap olunmuş kitabların təqdimatı keçirilmişdir.
Azərbaycan Respublikasında dövlət tərəfindən elmdə aparılan və yeni dövrün tələbləri ilə səsləşən islahatların, elmin inkişafı sahəsində ölkədə əldə edilmiş nailiyyətlərin və Azərbaycan Respublikasının Prezidenti yanında Elmin İnkişafı Fondunun bu sahədəki fəaliyyətinin operativ, dolğun və obyektiv şəkildə işıqlandırılması və təbliğində fərqlənən bir sıra KİV nümayəndələri diplom və hədiyyələrlə mükafatlandırılmışlar. Mükafatlandırılanlar arasında Azərbaycan Dövlət Teleqraf Agentliyinin - AZƏRTAC-ın əməkdaşı Kifayət Əliyeva da vardır.
Bölmənin digər xəbərləri
