Bakı, 20 oktyabr (AZƏRTAC). Oktyabrın 20-də “Azərenerji” Açıq Səhmdar Cəmiyyətində (ASC) milli energetiklərimizin peşə bayramı - Energetiklər Günü münasibətilə mətbuat konfransı keçirilmişdir.

Azərbaycanın energetika sənayesinin inkişafı üçün ölkəmizdə görülən işlərin əhəmiyyətini diqqətə çatdıran “Azərenerji” ASC-nin prezidenti E.Pirverdiyev bildirmişdir ki, ulu öndər Heydər Əliyevin müəyyənləşdirdiyi strategiya dövlətimizin başçısı İlham Əliyev tərəfindən uğurla davam etdirilir. Son illərdə elektrik enerjisi sistemində bir sıra vacib və əhəmiyyətli layihələr həyata keçirilmişdir.

E.Pirverdiyev gücü 780 meqavat (MVt) olan Cənub elektrik stansiyasının tikintisinin generasiya sahəsində ən vacib layihələrdən biri olduğunu diqqətə çatdırmışdır. Stansiya istifadəyə verildikdən sonra 1 kilovat-saata sərf olunan şərti yanacağın miqdarı 250 qram təşkil edəcək və ildə 700 min ton yanacağa qənaət ediləcəkdir. Yaxın zamanlarda gücü 400 MVt olan Tovuz su elektrik stansiyasının tikintisinə başlanacaqdır. Stansiyasının tikintisi su resurslarından daha səmərəli və çevik istifadə olunmasına imkan yaradacaqdır. Cari ilin sonunadək gücü 400 MVt olan “Şimal-2” buxar-qaz elektrik stansiyasının tikintisinin başlanması planlaşdırılır.

Generasiya sahəsində görülən işlər barədə məlumat verən E.Pirverdiyev demişdir ki, Azərbaycan nəinki öz enerji tələbatını tam təmin etmiş, hətta güclü ixrac potensialı yaratmışdır. Əldə olunmuş ixrac potensialını reallaşdırmaq üçün Azərbaycan-Gürcüstan-Türkiyə enerji dəhlizi layihəsinin icrasına başlanılmışdır. Layihə çərçivəsində bu ilin sonunadək Azərbaycanla Gürcüstanı birləşdirən 500 kilovoltluq xəttin Mingəçevir-Samux hissəsi, 2011-ci ilin sonuna kimi Gürcüstan sərhədinədək hissəsi tam hazır olacaqdır.

Bu ilin sonunadək elektrik enerjisi sisteminin idarə olunması sahəsində çox vacib layihə başa çatdırılmaqdadır. Bu, dispetçer mərkəzində MDB məkanında oxşarı olmayan SCADA sisteminin tətbiqidir. Layihə çərçivəsində dispetçer mərkəzi və bütün sistemi təşkil edən yarımstansiyalar, elektrik stansiyaları arasında 1200 kilometr uzunluğunda fibrooptik kabelin çəkilməsi idarəetmə məlumatlarının təhlükəsizliyini təmin edəcəkdir.

Bildirilmişdir ki, alternativ və bərpa olunan enerji mənbələrindən geniş istifadə edilməsi hazırda bütün dünyanın diqqət mərkəzindədir. Bu məsələ qlobal ekoloji problemlərin aradan qaldırılması, ətraf mühitin qorunması baxımından xüsusilə aktualdır. Bu sırada günəş kollektorlarının respublikamızda istehsalı və tətbiqi ilə bağlı ardıcıl işlər həyata keçirilir. Artıq yaxın vaxtlarda bu istiqamətdə istehsal sahəsi fəaliyyətə başlayacaqdır.

Tədbirdə KİV nümayəndələrinin sualları cavablandırılmışdır.

Sonda bu il ali məktəblərin energetika ixtisası üzrə qəbul imtahanlarında 500-dən artıq bal toplamış gənclər, həmçinin KİV-lərin nümayəndələri “Azərenerji” ASC tərəfindən mükafatlandırılmışlar.

######