Bakı, 24 iyun, AZƏRTAC

Əmək və Əhalinin Sosial Müdafiəsi Nazirliyi və Dünya Bankının birgə icra etdiyi “Azərbaycanda Məşğulluğa Dəstək Layihəsi” üzrə əsasən qazi və şəhid ailəsi üzvlərindən ibarət daha 100 şəxs aktivlərlə təmin olunub.

AZƏRTAC xəbər verir ki, özünüməşğulluq proqramına dəstək məqsədi daşıyan layihənin iştirakçılarına istehsal-xidmət sahələri üzrə avadanlıqlar təqdim edilib.

Verilmiş aktivlər hesabına onlar kiçik bizneslərini yaradıblar. Layihə üzrə həmin il həssas qruplara aid 3 minə yaxın şəxsə öz bizneslərini qurmaları üçün aktivlər verilib.

Əmək və Əhalinin Sosial Müdafiəsi Nazirliyi tabeliyində Dövlət Məşğulluq Agentliyinin idarə heyəti sədrinin müavini Cəmaləddin Quliyev deyib: “Dövlət başçısının əhalinin sosial müdafiəsinin gücləndirilməsi ilə əlaqədar Sərəncamına uyğun olaraq özünüməşğulluq proqramı həyata keçirilir. Dünya Bankının rəhbəri ilə Davos şəhərində keçirilən forumda əldə olunan razılaşmaya əsasən Azərbaycan hökuməti ilə 100 milyon dollarlıq kredit sazişi imzalanıb. Həmin vəsait hesabına özünüməşğulluq proqramı həyata keçirilməyə başlanılıb. “Azərbaycanda Məşğulluğa Dəstək Layihəsi” 22 min işsiz şəxsin özünüməşğulluq proqramına cəlb olunmasını və onların kiçik biznesə çıxışını təmin etməyi nəzərdə tutur. Məhz həmin proqrama uyğun olaraq bu gün bir qrup işsiz şəxs aktivlərlə təmin olunub. Onların arasında Vətən müharibəsində şəhid olanların ailə üzvləri, qazilər və müharibə iştirakçıları daha çox üstünlük təşkil edir”.

Özünüməşğulluq proqramına qoşulanlardan 23 yaşlı Məmmədnur Hüseynov deyib: “Üç ildən artıqdır ki, bərbərliklə məşğul oluram. Bir müddət əvvəl aktivlərlə təmin olunmaq üçün Xəzər rayon məşğulluq idarəsinə müraciət etmişəm. Ötən ilin mayında təlimlərdə iştirak edərək biznes planlarımı hazırlayıb vermişəm. Qiymətləndirməyə əsasən mənim də biznes planım uğur qazanıb. Mebel və yuyucu çanaqlı dəst, kondisioner, suqızdırıcı və digər avadanlıqlarla təmin olunmuşam. Güman edirəm ki, bundan sonrakı fəaliyyətimi Qala qəsəbəsində özümün şəxsi iş yerimdə davam etdirəcəyəm”.

Layihənin daha bir iştirakçısı Amin Məmmədzadə də yeni aktivlərlə təmin olunub, bərbərdir. O, ürək sözlərini belə ifadə edib: ”Binə südçülük sovxozunun ərazisində işləmişəm. Təlimlərdə iştirak etmiş və imtahanları uğurla keçmişəm. Yeni avadanlıqlarla təmin olunduqdan sonra fəaliyyətimin daha uğurlu olacağına inanıram”.

Tədbirə dəvət edilmiş özünüməşğulluq proqramının iştirakçıları yeni aktivlərlə təmin olunublar.