Bakı, 21 oktyabr, AZƏRTAC

“Azərbaycanfilm” kinostudiyasının 1982-ci ildə istehsalata buraxdığı “Əzablı yollar” filminin çəkilişindən 40 il ötür.

AZƏRTAC xəbər verir ki, Oqtay Məmmədzadənin ssenarisi əsasında çəkilən filmə Tofiq İsmayılov quruluş verib.

“Məlikməmmədin nağılı” adlı Azərbaycan xalq nağılının motivləri əsasında çəkilən filmin əsasını şən macəravari əhvalat təşkil edir.

Qeyd edək ki, “Azərbaycanfilm” kinostudiyasında nağıl janrında bir çox filmlər çəkilib. 1950-ci ildən 1982-ci ilə qədər 5 nağıl filmi çəkilərək kinosevərlərin baxışına təqdim edilmişdir. “Bir qalanın sirri”, “Sehrli xalat”, “Şir evdən getdi”, “Qərib cinlər diyarında” və “Əzablı yollar” filmi. Əslində sonuncu filmin adı “Məlikməmmədin nağılı” adlandırılmalıydı. Ancaq Moskvanın tələbi ilə necə ki, “Qaçaq Həbi”-“Atları yəhərləyin”, “Həzi Aslanov”-“Sizi dünyalar qədər sevirdim” adı ilə əvəz edilmişdisə, eləcə də “Məlikməmmədin nağılı”-“Əzablı yollar” adlandırılmışdı.