“Facebook” 1 milyon avro məbləğində cərimə edilib
Roma, 8 iyul, AZƏRTAC
İtaliyanın fərdi məlumatların mühafizəsinə dair təşkilatı məşhur sosial şəbəkəni “Cambridge Analytica” şirkəti ətrafında yaşanan qalmaqal ilə bağlı qayda pozuntusuna görə 1 milyon avro məbləğində cərimə edib.
AZƏRTAC İtaliya mətbuatına istinadla xəbər verir ki, Britaniya şirkəti təxminən 87 milyon “Facebook” istifadəçisinin razılığı olmadan onların şəxsi məlumatlarını toplayıb və fərdi siyasi reklam üçün istifadə edib. Məlumatların ötürülməsinin 2016-cı ildə Brexit üzrə keçirilən referendumda və həmin ildə Donald Trampın qələbəsi ilə yekunlaşan ABŞ-dakı prezident seçkilərində seçicilərin əhval-ruhiyyəsinə təsir etməsi ehtimal olunur.
Təhlükəsizlik təşkilatının məlumatına əsasən, cərimə 57 nəfər italyanın “Facebook” loqini vasitəsilə “ThisIsYourDigitalLife” tətbiqini yükləməsi ilə bağlıdır. Belə ki, bu tətbiq “Cambridge Analytica” şirkəti tərəfindən məlumatların toplanması üçün istifadə edilib.
Yükləmələrdən sonra tətbiqi yükləməyən və razılığını verməyən və ya məlumatlandırılmayan daha 214,077 italyan istifadəçi barədə də məlumat əldə olunub. Lakin bu məlumatların faktiki olaraq “Cambridge Analytica” şirkətinə ötürülmədiyi bildirilib.
Asiman Əsədov
AZƏRTAC-ın xüsusi müxbiri
Roma
Bölmənin digər xəbərləri
