Faiq Həsənov: “Naxçıvan–2018” Beynəlxalq Şahmat Festivalında təşkilatçılıq çox yüksək səviyyədədir
Naxçıvan, 2 may, Tural Kəngərli, AZƏRTAC
Dünyanın bir çox ölkələrində müxtəlif turnirlərdə olmuşam. Onu xüsusilə qeyd etmək istərdim ki, ümummilli lider Heydər Əliyevin anadan olmasının 95-ci ildönümünə həsr olunmuş “Naxçıvan-2018” Beynəlxalq Şahmat Festivalında təşkilatçılıq çox yüksək səviyyədədir.
Bu sözləri AZƏRTAC-ın Naxçıvan bürosuna müsahibəsində Azərbaycan Şahmat Federasiyasının vitse-prezidenti, şahmat festivalının baş hakimi Faiq Həsənov deyib.
Faiq Həsənov bildirib ki, hələ yarışlar başlamazdan aylar öncə dünyanın müxtəlif ölkələrindən bir çox şahmatçı federasiyaya müraciət edərək bu festivalda iştirak etmək istədiyini bildirmişdi. Çünki Naxçıvanda şahmatçıların yarışlarda rahat iştirakı, asudə vaxtını səmərəli keçirmələri, eləcə də istirahətləri üçün hər cür şərait var.
Builki festivalda 25 beynəlxalq qrossmeysterin, 17 beynəlxalq ustanın, 10 FİDE ustasının və ustalığa namizədlərin iştirak etməsinin də təsadüfi olmadığını deyən Faiq Həsənov vurğulayıb ki, iştirakçılar arasında xarici ölkələrin milli komandalarının üzvləri, reytinq əmsalı 2600-dən yuxarı olan bir neçə şahmatçı da vardır.
Azərbaycan Şahmat Federasiyasının vitse-prezidenti deyib: “Muxtar respublikanın belə bir şahmat bayramına ev sahibliyi etməsi qədim diyarın sürətli inkişafından, şahmat idman növünə göstərilən yüksək dövlət qayğısından xəbər verir. Özünün sürətli inkişafı ilə diqqətləri cəlb edən, beynəlxalq tədbirlərin keçirildiyi diyara çevrilən Naxçıvan Muxtar Respublikası həm də beynəlxalq idman yarışlarının keçirildiyi məkan kimi tanınıb. Muxtar respublikanın şahmat məktəblərində yaradılan şərait ölkə miqyasında nümunəyə çevrilib. Bundan başqa, orta məktəblərdə şahmat fənninin tədris olunmasını gələcəyə hesablanmış addım kimi qiymətləndirirəm”.
Sonda Faiq Həsənov festivalın yüksək səviyyədə təşkilinə görə minnətdarlığını bildirib.
Bölmənin digər xəbərləri
