FAO: Su ehtiyatlarının mühafizəsi və onların dayanıqlı idarə edilməsi daha təmiz gələcək yarada bilər
Bakı, 16 oktyabr, AZƏRTAC
Ümumdünya Qida Günündə Budapeştdə Birləşmiş Millətlər Təşkilatının (BMT) Ərzaq və Kənd Təsərrüfatı Təşkilatı (FAO), Macarıstan Ərzaq Bankları Birliyi və Macarıstan Kənd Təsərrüfatı Nazirliyi su ehtiyatlarının qeyri-sabit idarə edilməsinin səbəb olduğu əsas qida təhlükəsizliyi problemlərini müzakirə ediblər. FAO-nun Avropa və Mərkəzi Asiyadakı Regional nümayəndəliyindən AZƏRTAC-a bildirilib ki, Olimpiya Oyunlarının iştirakçısı olan su idmançıları da suya həsr olunmuş tədbirdə iştirak ediblər, burada suya qayğıkeş münasibətlə səciyyələnən gələcək yeməklərin təqdimatı və Ümumdünya Qida Gününə həsr olunmuş 21 ton ərzaq yüklənmiş, ehtiyacı olan ailələrə ianə kimi toplanmış 50 yük maşınından ibarət avtokolonun sürülərək gətirilməsi diqqəti cəlb edib.
Su Yer üzündə həyat üçün vacib amildir. Şirin su tükənməyən resurs deyil; suyu ağıllı şəkildə idarə etməyə başlamağın zamanı çatıb. Bu gün 2,4 milyard insan su çatışmazlığı olan ölkələrdə yaşayır və bu rəqəmin yaxın illərdə kəskin şəkildə artacağı gözlənilir. Quraqlıq, yağıntının olmaması və temperaturun artması artıq Avropaya zərər verir. İndi biz sudan istifadəyə diqqətlə yanaşmağa başlamalıyıq. Yediklərimiz və bu qidaların necə istehsal edilməsi su ehtiyatlarına öz təsirini göstərir. Hər kəs yerli, mövsümi və təzə qidalara üstünlük verməklə, hətta daha az su israf etməklə və suyun çirklənməsinin qarşısının alınması zamanı ondan təkrar istifadənin təhlükəsiz yollarını axtarıb tapmaqla bu mürəkkəb vəziyyəti yaxşılığa doğru dəyişə bilər.
“Su nəfəs aldığımız hava qədər qiymətlidir. Su, qidalanma və kənd təsərrüfatı istehsalı məqsədilə dünyadakı milyardlarla insanın həyatını və dolanışığını təmin etmək üçün zəruri ehtiyatdır. Bu ehtiyatın idarə edilməsinin innovativ və effektiv metodlarına investisiya yatırılması labüddür. Hökumətlərdən fərdlərə qədər bütün sənaye sahələri və obyektləri birgə şəkildə suya qənaət edən və xarici təsirlərə qarşı immunitetli dünya qurmaq üçün dəyişikliyi təşviq etməlidir.
Ümumdünya Qida Günündə FAO-nun dünyanın 150-dən çox ölkəsində təşkil etdiyi müxtəlif tədbirlər qida təhlükəsizliyi və su ehtiyatlarının davamlı idarə olunması problemlərinə diqqəti cəlb edir.
İqlim dəyişikliyi və su çatışmazlığının artması səbəbindən darı, kalış, noxud, mərcimək və çaytikanı kimi quraqlığa davamlı bitkilər bölgədə ərzaq məhsullarının istehsalında və müvafiq olaraq, qida rasionunda üstünlük təşkil edə bilər. Bu unudulmuş bitkilər yalnız quraqlığa davamlı və qida baxımından zəngin deyil, həm də kənd təsərrüfatı istehsalının səmərəliliyini artırmaq potensialına malikdir. Darı bitkisinin dəyəri barədə məlumatlılığın artırılması və tərkibindəki yüksək lif tərkibinə, qida dəyərinə və tərkibində qlüten və laktozanın olmamasına diqqətin artırılması üçün Birləşmiş Millətlər Təşkilatı 2023-cü ili Beynəlxalq Darı İli elan edib.
Bölmənin digər xəbərləri
