Federika Moqerininin varisi kim olacaq?
Berlin, 4 iyul, AZƏRTAC
Avropa Komissiyasının yeni sədrinin və Avropa İttifaqı Şurasının yeni prezidentinin kimlər olacağı artıq məlumdur. Çox güman, həmin vəzifələri müvafiq olaraq Ursula fon der Lyayen və Şarl Mişel tutacaqlar. Bəs Avropa İttifaqı iyerarxiyasında digər mühüm vəzifəyə - Aİ-nin xarici siyasət və təhlükəsizlik məsələləri üzrə ali nümayəndəsi vəzifəsinə əsas namizəd kimdir? Məlumdur ki, son vaxtlara qədər Aİ-nin xarici siyasət məsələləri ilə xarizmatik italyan xanım Federika Moqerini məşğul olurdu. Azərbaycan diplomatiyası “Şərq tərəfdaşlığı” Proqramı çərçivəsində bu xanımla konstruktiv münasibətlər qurmuşdu.
AZƏRTAC xəbər verir ki, İspaniya XİN-in başçısı Jozep Borrelin adı tez-tez Moqerininin varisi kimi hallanır. 72 yaşlı sosialist Borrel namizədliyinin təsdiq olunması üçün Avropa Komissiyasının sədrinin dəstəyini almalıdır. Almaniya mətbuatı onun barəsində müsbət rəylər yazır. “Deutsche Welle” (“Alman dalğası”) nəşrinin məlumatında deyilir: “Borrel 1980-ci illərin əvvəlindən etibarən yüksək vəzifələr tutur. Fon der Lyayen və Mişel kimi, o da Brüsseli yaxşı tanıyır. 2004-2007-ci illərdə Avropa Parlamentinin sədri olub. Müşahidəçilərin fikrincə, ispaniyalı çox danışmağı və zarafat etməyi xoşlayır”.
Vüqar Seyidov
AZƏRTAC-ın xüsusi müxbiri
Berlin
Bölmənin digər xəbərləri
