FİZİKA FƏNNİ ÜZRƏ TEST TAPŞIRIQLARININ TƏHLİLİ DAVAM ETDİRİLMİŞDİR
Tələbə Qəbulu üzrə Dövlət Komissiyasından AZƏRTAC-a bildirmişlər ki, fizika fənni üzrə elmi-metodiki seminar keçirilmişdir.
Azərbaycan Milli Elmlər Akademiyası (AMEA) alimlərinin və ayrı-ayrı təhsil müəssisələri nümayəndələrinin iştirak etdikləri seminarda 2008-ci ildə ali məktəblərə I ixtisas qrupu üzrə qəbul imtahanlarında istifadə edilmiş test tapşırıqlarının elmi-metodiki cəhətdən təhlili davam etdirilmişdir (A variantı).
AMEA Fizika İnstitutunun əməkdaşları M.Hüseynli və Q.Mehdiyev, digər mütəxəssis və müəllimlər çıxış edərək test tapşırıqlarının respublikanın orta məktəblərində qüvvədə olan tədris proqramı əsasında hazırlanmış qəbul proqramına və dərsliklərə tam uyğun olduğunu qeyd etmişlər.
Bu il də qəbul imtahanlarında fizika fənnindən daha çox məntiqi düşüncəyə əsaslanan, nəzəri biliklərin tətbiqini tələb edən keyfiyyət xarakterli test tapşırıqlarına üstünlük verilmişdir. Bu tip test tapşırıqları abituriyentlərin hadisələrin fiziki mahiyyətini, müxtəlif fiziki hadisələr arasında səbəb-nəticə əlaqələrini nə dərəcədə mənimsədiklərini yoxlamağa xidmət edir.
Müzakirələr nəticəsində statistik göstəricilər əsasında qəbul imtahanlarında abituriyentlərin cavab verməkdə çətinlik çəkdikləri və cavab verməkdən imtina etdikləri test tapşırıqları müəyyənləşdirilmişdir. Həmin test tapşırıqlarının izahına dair metodiki tövsiyə hazırlanması və “Abituriyent” jurnalında dərc edilməsi qərara alınmışdır.
Bölmənin digər xəbərləri
