Folklorşünas-alim Azad Nəbiyevin 80 illik yubileyinə həsr olunmuş elmi sessiya təşkil edilib
Bakı, 24 aprel, AZƏRTAC
Bakı Dövlət Universitetində Azərbaycan Milli Elmlər Akademiyasının Humanitar Elmlər Bölməsi, AMEA-nın Folklor İnstitutu və BDU-nun Filologiya fakültəsinin birgə təşkilatçılığı ilə görkəmli folklorşünas-alim, filologiya elmləri doktoru, professor, AMEA-nın müxbir üzvü olmuş Azad Nəbiyevin 80 illik yubileyinə həsr edilmiş elmi sessiya keçirilib.
Bu barədə AZƏRTAC-a AMEA-dan məlumat verilib.
Tədbirdə çıxış edən BDU-nun Azərbaycan şifahi xalq ədəbiyyatı kafed¬rasının mü¬diri professor Səhər Orucova professor Azad Nəbiyevin Azərbaycan folklorşünaslığında xüsusi xidmətləri olduğunu vurğulayıb. O qeyd edib ki, hazırda rəhbərlik etdiyi, A.Nəbiyev tərəfindən yaradılmış kafedra mərhum alimin elmi-təşkilatçılıq bacarığının bariz nümunəsidir.
Sonra çıxış edən AMEA-nın Humanitar Elmlər Bölməsinin Elmi şurasının sədr müavini akademik Teymur Kərimli vurğulayıb ki, hələ aspirantura təhsili aldığı illərdən A.Nəbiyevi təcrübəli pedaqoq, elmi məsələlərə ciddi yanaşması ilə seçilən alim kimi tanıyıb. Onun elmi irsi bu gün də aktuallığını qoruyub saxlayır. Akademik vurğulayıb ki, Azad Nəbiyevin yetişdirdiyi kadrlar bu gün respublikanın müxtəlif qurumlarında uğurla fəaliyyət göstərir.
AMEA-nın Folklor İnstitutunun direktoru dosent Hikmət Quliyev bildirib ki, A.Nəbiyev həm bakalavriat, həm də magistratura dövründə onun diplom və dissertasiya işinə rəhbərlik edib və ümumən onun folklora elmi marağının artmasında, bu sahəyə gəlməsində mühüm rol oynayıb: “Azad Nəbiyev Azərbaycan folklorşünaslığına şəhər folkloru, balıqçı folkloru, ipəkçi nəğmələri, hanaçı nəğmələri, qaçaq folkloru və başqa yeni anlayışlar gətirib. Bəzi janrların etnopsixoloji düşüncə ilə bağlı tərəflərinə ilk dəfə onun əsərlərində toxunulub. Alim özünün ikicildlik “Azərbaycan xalq ədəbiyyatı” dərsliyində şifahi yaradıcılıq örnəklərinin “lirik, epik, dramatik növlər” bölgüsündən imtina edib, bunu lirik, epik, dramatik üslub kimi verməklə, folklorun filoloji baxış bucağı ilə məhdudlaşan təsnifatından ilk dəfə kənara çıxıb. Əslində, bu yanaşma filoloji folklorşünaslıqdan sosial-antropoloji folklorşünaslığa keçidin ilkin əlamətləri kimi də qəbul oluna bilər. Azad Nəbiyev öz tədqiqatlarında o zamanadək folklorşü¬naslığımızda diqqət yetirilməyən bir çox məsələləri tədqiqat müstəvisinə gətirib”.
Elmi sessiyada professor “Azad Nəbiyev və folklor mədəni irsi”, “Azərbaycan folklorunun görkəmli tədqiqatçısı və təbliğatçısı”, “Milli folklorşünaslığımızda Azad Nəbiyev assosiasiyası”, “Etnopsixoloji düşüncə ilə bağlı yaranan janrlar” mövzularında məruzələr dinlənilib.
Daha sonra professor Cəlil Nağıyev, Folklor İnstitutunun şöbə müdiri professor Seyfəddin Rzasoy, dosent Məhərrəm Vəliyev alimlə bağlı xatirələrini bölüşüblər.
Elmi sessiyada A.Nəbiyevin həyat və yaradıcılığından bəhs edən videoçarx təqdim olunub.
Alimin ailəsi adından çıxış edən qızı və davamçısı Azərbaycan şifahi xalq ədəbiyyatı kafedrasının müəllimi filologiya elmləri doktoru Ülkər Nəbiyeva elmi sessiyanın təşkilatçılarına və iştirakçılarına təşəkkürünü bildirib.
Bölmənin digər xəbərləri
