“France 5” kanalı Əlcəzairdə vaxtilə kimyəvi silahdan istifadə edilməsi haqqında sənədli filmi proqramdan çıxarıb
Paris, 14 mart, AZƏRTAC
Fransa-Əlcəzair diplomatik gərginliyi kontekstində “France 5” telekanalı Fransa ordusunun Əlcəzairdə kimyəvi silahdan istifadəsinə dair yeni sənədli filmi proqramdan çıxarıb. “Əlcəzair. Xüsusi silah bölmələri” adlı bu sənədli film martın 6-da RTS kanalı tərəfindən yayımlanıb.
AZƏRTAC xəbər verir ki, “France 5” telekanalı filmin yayımını əvvəlcə martın 16-na planlaşdırsa da, onu proqramdan çıxarıb. Etirazla qarşılaşandan sonra telekanal bunu ABŞ və Rusiya arasında cari hadisələrə diqqət yetirmək zərurəti ilə əsaslandırıb.
Bununla belə, “France 5” kanalında nümayiş etdirilməli olan Edit Buvyenin “Suriya: Əsəd qəbiləsinin süqutu” filminə daha sonra 23 mart kimi yeni yayım tarixi verilsə də, “Əlcəzair. Xüsusi silah bölmələri” sənədli filmi ilə bağlı heç bir tarix bildirilməyib.
Paris və Əlcəzair arasında onsuz da gərgin bir mühitdə bəziləri bunu siyasi qərar kimi qiymətləndirir; çünki bu film hərbi arxivlərdə uzun müddət saxlanılan tabuları göstərir.
Bu arada sənədli film “France Télévisions” saytında onlayn yerləşdirilib.
Xatırladaq ki, tarixçi Kristof Lafayenin araşdırmaları və Kler Billetin rejissorluğu əsasında çəkilmiş 52 dəqiqəlik bu sənədli film ilk dəfə olaraq Əlcəzair müharibəsi zamanı Fransa ordusunun qadağan olunmuş kimyəvi qazlardan necə istifadə etdiyini açıqlayır.
Bölmənin digər xəbərləri
