Bakı, 25 noyabr, AZƏRTAC

Bu gün Kəlbəcər rayonunun Ermənistanın işğalından azad edilməsinin dördüncü ildönümüdür. Bu tarixi nailiyyət Azərbaycan Prezidenti, Müzəffər Ali Baş Komandan İlham Əliyevin qətiyyətli və bacarıqlı rəhbərliyi sayəsində mümkün olub.

Bu sözləri AZƏRTAC-a açıqlamasında Milli Məclisin deputatı Qaya Məmmədov söyləyib.

O bildirib ki, bu misilsiz zəfərimizi qeyd edərkən, 1993-cü ildə Kəlbəcərin işğalı zamanı baş vermiş faciəvi hadisələri də xatırlayırıq. Kəlbəcər rayonu uzunmüddətli mühasirə və şiddətli döyüşlərdən sonra 1993-cü ilin aprel ayının əvvəlində işğal edilmişdi. Ermənistan ordusu birbaşa öz ərazisindən - Basarkeçər istiqamətindən silahlı hücuma keçərək Kəlbəcər rayonunu işğal etdi və rayonun 60 min nəfərdən artıq sakinini etnik təmizləməyə məruz qoydu. Rayon əhalisinin əksəriyyəti bir gündən az müddət ərzində 3 min metrdən artıq yüksəklikdən keçən dağ keçidlərindən piyada qaçmağa məcbur oldu, yüzlərlə insan donvurma nəticəsində həyatını itirdi. Ermənistanın hərbi birləşmələri mülki əhaliyə qarşı rayonun bir çox yerində, o cümlədən Başlıbel, Zülfüqarlı və Günəşli kəndlərində kütləvi qırğınlar törədib. Çoxlu sayda Kəlbəcər sakini itkin düşmüşdü. Ermənistan məcburi itkin düşməyə məruz qoyduğu azərbaycanlıların taleyinə aydınlıq gətirməkdən, müharibə cinayətləri və insanlıq əleyhinə cinayətlər törədənləri ədalət mühakiməsi qarşısına çıxarmaqdan boyun qaçırır. Əksinə Ermənistan bu cinayətlərdə iştirak etmiş şəxsləri, o cümlədən Kəlbəcərdə azərbaycanlıların etnik təmizlənməsinə şəxsən rəhbərlik edib və digər müharibə cinayətləri törətmiş Monte Melkonyanı qəhrəmanlaşdırır.

İşğal dövründə Ermənistan Kəlbəcəri viran qoyub, onun mədəni irs abidələrini, qəbiristanlıqlarını və infrastrukturunu məhv edib və təbii sərvətlərini talayıb. Ermənistan 2020-ci ilin noyabrında nizamlı şəkildə geri çəkilmək üçün yalvarıb aldığı əlavə vaxtı belə vandalizm aktları törətmək, o vaxta qədər salamat qalmış binaları yandırmaq, heyvanları öldürmək və bitki örtüyünü dağıtmaq üçün istifadə edib.

“Kəlbəcərin işğalı məsələsində Fransanın məsuliyyətinə toxunmaq vacibdir. 1993-cü ilin aprel ayında BMT Təhlükəsizlik Şurası (TŞ) Kəlbəcərin işğalı barədə qətnamə layihəsini müzakirə edərkən, TŞ-nin daimi üzvü olan Fransa Ermənistanın Kəlbəcərə silahlı hücumu birbaşa öz ərazisindən başlatması faktını ört-basdır etməyə çalışıb. Bu, Təhlükəsizlik Şurasının digər üzvləri tərəfindən təqdim edilən, Ermənistanın təcavüzünü və sülhü pozmasını sübut edən, peyk görüntüləri də daxil olmaqla, danılmaz dəlillərə baxmayaraq, baş verib. Bu fakt göstərir ki, Fransa əslində Ermənistanın Kəlbəcəri işğalını dəstəkləyib və onu işğalı otuz ilə yaxın müddət ərzində davam etdirməyə cəsarətləndirib”, - deyə Q.Məmmədov vurğulayıb.

Deputat əlavə edib ki, bu gün biz Kəlbəcərin şəhid olmuş qəhrəman müdafiəçilərinin və günahsız mülki qurbanlarının xatirəsini ehtiramla yad edirik. Rayonun davam edən yenidənqurma və bərpası bizi sevindirir. Əminik ki, aparılan irimiqyaslı bərpa işləri keçmiş məcburi köçkünlərin tezliklə geri qayıtmasına şərait yaradacaq və bu bölgəni yenidən Azərbaycan iqtisadiyyatının və mədəniyyətinin mühüm mərkəzlərindən birinə çevirəcək.