Gəncə, 26 oktyabr, Elcan Məmmədov, AZƏRTAC

Gəncə Dövlət Universitetinin (GDU) İqtisadiyyat və idarəetmə fakültəsində Vətən müharibəsinin qəhrəmanlarından olan şəhid Hikmət Məmmədov və şəhid Orxan Cümşüdovun əziz xatirəsinə həsr edilən “Xarıbülbül” adlı tədbir keçirilib.

Tədbirdə Gəncə Dövlət Universitetinin tədris məsələləri üzrə prorektoru dosent Şahin Xurşudov, humanitar məsələlər üzrə prorektoru Gülsüm Fətəliyeva, İqtisadiyyat və idarəetmə fakültəsinin dekanı dosent Məsim Abadov və şəhidlərin ailə üzvləri iştirak ediblər.

Universitetdən AZƏRTAC-ın bölgə müxbirinə verilən məlumata görə, əvvəlcə Dövlət Himni səsləndirilib, Vətən müharibəsində həlak olan şəhidlərin əziz xatirəsi anılıb.

Gülsüm Fətəliyeva çıxış edərək bildirib ki, bu gün Azərbaycan xalqında milli vətənpərvərlik hissinin yüksək olması qürurvericidir. Gəncə Dövlət Universitetində tez-tez qazilərlə və şəhid ailələrinin üzvləri ilə görüşlər keçirilir, onların döyüş yolları, göstərdikləri qəhrəmanlıqlar tələbələrə çatdırılır.

Şəhidin ailə üzvləri Hikmət Məmmədov və Orxan Cümşüdovun döyüş yolundan danışıblar. Qeyd edilib ki, universitetinin İqtisadiyyat və idarəetmə fakültəsinin məzunları olmuş şəhid Hikmət Məmmədov və şəhid Orxan Cümşüdov daim seçiliblər. Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin Sərəncamına əsasən Orxan Cümşüdov ölümündən sonra “Vətən uğrunda”, “Füzulinin azad olunmasına görə” medalları, Goranboy rayonunun Buzqulaq kəndi istiqamətində döyüş tapşırığını yerinə yetirərkən həlak olmuş şəhid Hikmət Məmmədov isə ölümündən sonra “Vətən uğrunda”, “Kəlbəcərin azad olunmasına görə” medalları ilə təltif ediliblər.

Tədbirin davamında İqtisadiyyat və idarəetmə fakültəsinin tələbələri tərəfindən vətənpərvərlik mövzusunda şeirlər, mahnılar səsləndirilib.

Universitetin İqtisadiyyat və idarəetmə fakültəsində şəhid Hikmət Məmmədov və şəhid Orxan Cümşüdov adına auditoriyaların da açılışı olub. Auditoriyalarla tanışlıq zamanı qeyd edilib ki, burada olan fotostend vasitəsilə şəhidlərin keçdikləri həyat yolu daim öyrəniləcək.

Hər iki şəhidin yaxınları şəhid Hikmət Məmmədov və şəhid Orxan Cümşüdov adına auditoriyanın hazırlanaraq tələbələrin ixtiyarına verilməsinə görə universitet rəhbərliyinə minnətdarlıqlarını bildiriblər.