“Gənc Alimlərin birinci Respublika İnnovativ İdeya Yarmarkası” açılmışdır
Bakı, 19 noyabr (AZƏRTAC). Noyabrın 19-da Azərbaycan Gənclər və İdman Nazirliyi, AMEA Rəyasət Heyəti, Azərbaycan Gənc Alim, Aspirant və Magistrlər Cəmiyyətinin birgə təşkilatçılığı ilə gənc alimlərin birinci Respublika İnnovativ İdeya Yarmarkası açılmışdır.
Gənclər və idman naziri Azad Rəhimov Azərbaycanda dövlət tərəfindən elmin, təhsilin inkişafına, gənc alimlərin yetişdirilməsinə göstərilən qayğıdan danışmışdır. Bildirmişdir ki, gənclərimizin xaricdə təhsil almasına, elmi əsərlərinin nəşr edilməsinə, beynəlxalq elmi tədbirlərdə iştirakına şərait yaradılması bunun bariz nümunəsidir. Nazir vurğlamışdır ki, gənclərin müasir elm və texnikanın inkişafında böyük rol oynaması təqdirəlayiqdir.
Nazirin müavini İntiqam Babayev bildirmişdir ki, tədbirin məqsədi elmi gəncliyin imkanlarının üzə çıxarılması, maraqların gerçəkləşməsi istiqamətində praktiki yardım, elmi tədqiqatçıların aktivliyinin və elmə marağın artırılması, elmdə rəqabət mühitinin formalaşması, eləcə də elmi problemlərin ictimaiyyətin diqqətinə çatdırılmasıdır.
Yarmarkada AMEA institutlarında, eləcə də ölkəmizin müvafiq təşkilatlarında çalışan gənc alim və tədqiqatçıların elmi məqalə, tezis və məruzələri təqdim olunacaqdır.
AMEA-nın prezidenti akademik Mahmud Kərimov, Azərbaycan Respublikasının Prezidenti yanında Elmin İnkişafı Fondunun icraçı direktoru Elçin Babayev, təhsil nazirinin müavini İradə Hüseynova və digərləri tədbirin əhəmiyyətindən danışmışlar.
Bildirilmişdir ki, yarmarkada gənc alim və tədqiqatçıların iştirakı ilə “Elm çətiri altında: Gənc alim və tədqiqatçıların innovativ inkişafı üçün intellektual potensialın stimullaşdırılması və təkrar istehsalı”, “Elmin iqtisadi gücü: Gənc alim və tədqiqatçıların yeni ideya və ixtiralarının iqtisadiyyata tətbiqi yolları”, “Yaşıl çətir: Ekologiya və qlobal iqlim dəyişiklikləri və bu proseslərin Azərbaycanda təzahürləri” mövzularında konfranslar keçiriləcəkdir.
“Azərbaycanda biomüxtəlifliyin qorunması və əkinəyararlı torpaqların erroziyaya məruz qalmasının qarşısının alınması yolları” və “Dünya elminə inteqrasiya: Gənc tədqiqatçıların innovativ aktivliyinin artırılması - informasiya mübadiləsi işinin təşkili” mövzuları əsasında seminarların təşkili də nəzərdə tutulmuşdur.
Tədbirdə, həmçinin “Bilik iqtisadiyyatına doğru!” - ən yaxşı elmi-innovativ ideya və ixtiraların gələcəkdə iqtisadiyyata tətbiq imkanlarını artırmaq məqsədi ilə gənc alim və tədqiqatçılar arasında I Biznes Planlar Müsabiqəsi də keçiriləcəkdir. Görkəmli alimlərdən ibarət münsiflər heyəti tərəfindən yüksək intellekt və bacarıq nümayiş etdirən gənc alimlər qalib sayılıb mükafatlandırılacaqlar.
Beş gün davam edəcək tədbirin sonuncu günü gənc alimlərin “Ekoturu” təşkil ediləcək və iştirakçılar Bakı şəhərinin Qaradağ rayonundakı palçıq vulkanlarını görmək və açıq havada bu sahə üzrə tədqiqat aparan gənc alimlərin təqdimatı ilə yaxından tanış olmaq imkanı qazanacaqlar.
Bölmənin digər xəbərləri
