Gəncə, 12 avqust (AZƏRTAC). Gəncədə yaradılacaq Gənclər Mərkəzinin tikintisi ilə əlaqədar hazırlıq işləri başa çatmaq üzrədir. Bu məqsəd üçün artıq Heydər Əliyev parkında beş hektar torpaq sahəsi də ayrılmışdır.

Gəncə Şəhər Gənclər və İdman Baş İdarəsindən AZƏRTAC-a bildirmişlər ki, Yeni Gəncə qəsəbəsində ayrılmış ərazidə gözəl və yaraşıqlı, dördmərtəbəli Gənclər Mərkəzinin tikintisi üçün hazırlıq işlərinə başlanılmışdır. Artıq mərkəzin layihəsi hazırdır. Yaxın günlərdə tikinti işlərinə başlanılacaqdır. Burada müxtəlif dərnəklər, konfrans zalları, beynəlxalq tədbirlərdə iştirak edəcək qonaqlar üçün otel, idman yarışlarının keçiriləcəyi zallar və s. nəzərdə tutulmuşdur. Bundan əlavə, ərazidə açıq havada idman qurğuları, istirahət məkanları, kafe və stadionun tikilməsi də planlaşdırılır.

Mərkəz 2013-cü ildə istifadəyə veriləcəkdir.