GƏNCƏDƏ SİRK BİNASI İNŞA OLUNACAQDIR
Azərbaycanın ikinci sənaye və mədəniyyət mərkəzi olan Gəncədə sirk binası tikiləcəkdir. Dövlətimizin başçısı İlham Əliyevin Gəncəyə səfəri zamanı irəli sürülən bu təşəbbüs artıq öz həllini tapmaq üzrədir. Hazırda şəhərdə geniş tamaşaçı kütləsini əhatə edəcək yeni sirk binasının tikilməsi üçün hazırlıq işlərinə başlanılmışdır.
Şəhər mədəniyyət və turizm idarəsinin rəisi Mina Məlikova AZƏRTAC-ın müxbirinə demişdir ki, hələlik binanın tikiləcəyi yer müəyyənləşdirilir. Bu məsələ öz həllini tapdıqdan sonra layihə-smeta sənədləri hazırlanacaq və tender elan ediləcəkdir. Kadr məsələsinə gəldikdə isə, idarə rəisi bildirmişdir ki, Gəncə sirkinin öz truppası formalaşanadək Bakının və digər ölkələrin sirk ustalarını dəvət etmək fikrindəyik.
Bölmənin digər xəbərləri
