“Gəncliyin bir həftəsi”ndə intellektual yarış
Bakı, 30 yanvar, AZƏRTAC
Təhsil Nazirliyinin “Bir” Tələbə-Könüllü proqramının təşkilatçılığı ilə 2 fevral - Gənclər Gününə həsr olunan “Gəncliyin bir həftəsi” adlı tədbir davam edir.
Nazirlikdən AZƏRTAC-a bildiriblər ki, tədbirin üçüncü günü proqramın “Zövq al” istiqaməti çərçivəsində altı komandanın iştirakı ilə “Breyn-rinq” intellektual yarışı keçirilib. Yarışda “Öyrət” komandası qalib olub.
“Gəncliyin bir həftəsi” gənc tələbə-könüllülərin bir şəxs kimi inkişafının təmin olunması, dünyagörüşlərinin artırılması, asudə vaxtlarının səmərəli dəyərləndirilməsi, könüllülük dəyərlərinin aşılanması məqsədi daşıyır.
Proqram çərçivəsində hər gün altı istiqamət (“Yaşa”, “Yaşat”, “Öyrən”, “Öyrət”, “Kəşf et”, “Zövq al”) üzrə təlimlər, görüşlər, intellektual və komanda oyunları, tələbə-könüllülərin ifasında konsert proqramı keçirilir.
Tədbir fevralın 2-dək davam edəcək.
Qeyd edək ki, “Bir” Tələbə-Könüllü proqramı milli könüllü platforması kimi 20 mindən çox vahid tələbə-könüllü bazasına malikdir. Tələbələrin şəxsi inkişafı və asudə vaxtlarının səmərəli dəyərləndirilməsi üçün altı istiqamətdə fəaliyyət göstərən proqram tərəfindən indiyədək 400-dən çox yerli və beynəlxalq tədbirə könüllü, təşkilati dəstək verilib. Tələbələr www.konullu.edu.az saytı vasitəsilə qeydiyyatdan keçə və proqrama qoşula bilərlər.
Bölmənin digər xəbərləri
